सुदानमधील नयाला (Nyala) येथे झालेल्या लष्करी ड्रोन हल्ल्यात १०० हून अधिक लोकांचा मृत्यू झाला आहे. या हल्ल्यामुळे मोठा मानवी हक्क प्रश्न निर्माण झाला असून, दुसरीकडे अल-मर्खियात (Al-Markhiyat) पॉवर स्टेशनवरील हल्ल्याने खार्तूममधील वीजपुरवठा विस्कळीत झाला आहे.
सुदानमधील गृहयुद्ध अधिक तीव्र झाले असून नयाला येथील एका बाजारपेठेवर झालेल्या ड्रोन हल्ल्याने सर्वत्र खळबळ उडाली आहे. मानवी हक्क संघटनांच्या माहितीनुसार, सोमवारी झालेल्या या भीषण हल्ल्यात १०० पेक्षा जास्त जणांचा मृत्यू झाला असून, १०० हून अधिक नागरिक जखमी झाले आहेत. स्थानिक रुग्णालयांवर ताण वाढला असून मदतीसाठी युद्धपातळीवर प्रयत्न सुरू आहेत.
पायाभूत सुविधांवर मोठा परिणाम
केवळ जीवितहानीच नाही, तर या युद्धाचा मोठा फटका देशाच्या ऊर्जा क्षेत्राला बसला आहे. ओम्दुरमानमधील अल-मर्खियात ट्रान्सफॉर्मर स्टेशनवर झालेल्या ड्रोन हल्ल्यामुळे खार्तूम आणि आसपासच्या भागातील वीजपुरवठा तब्बल १२ तासांहून अधिक काळ बंद होता. अधिकार्‍यांच्या मते, या एका हल्ल्यामुळे राजधानीच्या एकूण वीजपुरवठ्याचा ६० टक्के भाग ठप्प झाला होता. वीज नसल्यामुळे रुग्णालयांना जनरेटरवर अवलंबून राहावे लागत आहे आणि पाणीपुरवठा करणारी केंद्रेही बंद पडली आहेत.
एप्रिल २०२३ पासून सुरू असलेले संघर्ष
एप्रिल २०२३ पासून सुरू असलेल्या या यादवीत आतापर्यंत ५९,००० पेक्षा जास्त लोकांचा मृत्यू झाल्याचा अंदाज वर्तवला जात आहे. सुमारे ३ कोटी ४० लाख लोकांना तातडीने मदतीची गरज आहे. आंतरराष्ट्रीय संस्था आता युद्धरत गटांवर अन्न आणि वैद्यकीय पुरवठा करण्यासाठी सुरक्षित कॉरिडॉर उपलब्ध करून देण्याबाबत दबाव आणत आहेत, मात्र पायाभूत सुविधांचे होणारे नुकसान हे स्थैर्यासाठी मोठा अडथळा ठरत आहे.