फ्रान्समध्ये महागाई आणि पेन्शनच्या मुद्द्यावरून सुरू असलेल्या देशव्यापी संपामुळे जगप्रसिद्ध Eiffel Tower बंद करण्यात आला आहे. या आंदोलनामुळे सार्वजनिक सेवा विस्कळीत झाल्या असून, २०२७ च्या राष्ट्राध्यक्ष निवडणुकीच्या पार्श्वभूमीवर सरकारसमोर मोठे आव्हान उभे राहिले आहे.
जगातील सर्वाधिक पर्यटकांचे आकर्षण असलेला Eiffel Tower गुरुवारी पर्यकांसाठी बंद करण्यात आला. फ्रान्समध्ये सध्या सुरू असलेल्या कामगार संघटनांच्या आणि विद्यार्थी संघटनांच्या तीव्र आंदोलनामुळे जनजीवन विस्कळीत झाले आहे. वेतन वाढ, महागाई आणि शिक्षणासाठी मिळणारा निधी या प्रमुख मागण्यांसाठी कर्मचारी रस्त्यावर उतरले आहेत.
अर्थव्यवस्थेवर परिणाम
सार्वजनिक वाहतूक, शाळा आणि अत्यावश्यक सेवांवर या संपचा मोठा परिणाम दिसून येत आहे. देशभरात सुमारे ७०,००० पोलीस तैनात करण्यात आले असून, आंदोलनाचा आवाका प्रचंड मोठा आहे. फ्रान्समध्ये वाढती महागाई आणि मंदीचे सावट यामुळे लोकांमध्ये असंतोष वाढला आहे. याचा थेट फटका फ्रान्सच्या पर्यटन क्षेत्राला बसत असून, हे क्षेत्र देशाच्या अर्थव्यवस्थेचा कणा मानले जाते.
राजकीय पेच
राष्ट्राध्यक्ष इमॅन्युएल मॅक्रॉन यांच्या प्रशासनासाठी ही परिस्थिती एक मोठी कसोटी मानली जात आहे. संविधानानुसार मॅक्रॉन सलग तिसऱ्यांदा निवडणूक लढवू शकत नसल्याने, २०२७ च्या निवडणुकीच्या दृष्टीने विरोधी पक्ष या परिस्थितीचा फायदा घेण्याचा प्रयत्न करत आहेत. सरकारच्या आर्थिक सुधारणांना या आंदोलनामुळे मोठा खोडा बसला आहे.
जागतिक बाजारपेठेतील गुंतवणूकदारांसाठी युरोपमधील ही अस्थिरता चिंतेची बाब आहे. कामगार संघटना आणि सरकार यांच्यात तोडगा न निघाल्यास आगामी काळात फ्रान्सची अर्थव्यवस्था अधिक डळमळीत होण्याची शक्यता वर्तवण्यात येत आहे.