पाकिस्तानच्या बलुचिस्तान प्रांतात सुरक्षा दलांनी मोठी कारवाई करत १६ दहशतवाद्यांचा खात्मा केला आहे. मात्र, दुसरीकडे नशकी जिल्ह्यात पोलिओ लसीकरण पथकाचे संरक्षण करणाऱ्या दोन पोलिसांची हत्या झाल्याने खळबळ उडाली आहे.
बुधवारी बलुचिस्तानातील विविध जिल्ह्यांमध्ये सुरक्षा दलांनी तीव्र कारवाई केली. मस्तुंगमधील कनाक व्हॅलीमध्ये सुरक्षा चौकीवर हल्ला करण्याचा प्रयत्न करणाऱ्या ९ दहशतवाद्यांना कंठस्नान घालण्यात आले. या कारवाईदरम्यान सुरक्षा दलांनी मोठ्या प्रमाणात शस्त्रे आणि दारूगोळा जप्त केला आहे.
तसेच, तुर्बत जिल्ह्यातील जाउसॅक भागात गुप्तचर माहितीच्या आधारे राबवलेल्या मोहिमेत आणखी २ दहशतवादी मारले गेले. क्वेटा शहराजवळील आघबार्ग पोलीस ठाण्यावर झालेल्या पहाटेच्या हल्ल्याला पोलिसांनी चोख प्रत्युत्तर दिले, ज्यामध्ये Tehreek-e-Taliban Pakistan (TTP) शी संबंधित ५ दहशतवादी ठार झाले. २०२२ मध्ये युद्धविराम संपल्यापासून टीटीपी या भागात पुन्हा सक्रिय झाला आहे.
एकीकडे सुरक्षा दलांचे हे यश असतानाच, नशकी जिल्ह्यात सार्वजनिक आरोग्याच्या मोहिमेला गालबोट लागले. अज्ञात बंदूकधाऱ्यांनी पोलिओ लसीकरण पथकाच्या सुरक्षेसाठी तैनात असलेल्या पोलिसांवर हल्ला केला, ज्यात दोन अधिकारी शहीद झाले. सुदैवाने, आरोग्य कर्मचारी सुरक्षित आहेत. सध्या पाकिस्तानमध्ये ३ कोटी १० लाखांहून अधिक मुलांना लस देण्याचे उद्दिष्ट असलेली मोहीम सुरू असून, या हिंसक घटनांमुळे सुरक्षेचे मोठे आव्हान निर्माण झाले आहे.