फ्रेंच क्वांटम हार्डवेअर कंपनी Pasqal ने Nasdaq वर लिस्टिंग करत तब्बल **€३१२.९ दशलक्ष** उभे केले आहेत. कंपनी आता २०२७ पर्यंत आपले उत्पादन वाढवण्यावर भर देणार आहे, मात्र सुरुवातीच्या टप्प्यातील मोठे नुकसान आणि महसूल मिळवण्यातील विलंब गुंतवणूकदारांसाठी चिंतेचा विषय ठरू शकतो.
क्वांटम हार्डवेअर विकसित करणारी फ्रेंच कंपनी Pasqal आता अधिकृतपणे Nasdaq वर लिस्ट झाली आहे. या लिस्टिंगद्वारे कंपनीने €३१२.९ दशलक्ष भांडवल उभारले असून, याचा वापर संशोधन क्षेत्राकडून व्यावसायिक विक्रीकडे (Commercial Sales) वळण्यासाठी केला जाणार आहे. २०२७ पर्यंत मशीन उत्पादनाची क्षमता मोठ्या प्रमाणात वाढवण्याचे कंपनीचे उद्दिष्ट आहे.
आर्थिक आव्हाने आणि रिअलिटि चेक
सध्या कंपनीच्या संशोधनावर होणारा खर्च मिळणाऱ्या महसुलापेक्षा कितीतरी जास्त आहे. चालू वर्षाच्या पहिल्या सहामाहीत कंपनीने १४% ची महसूल वाढ नोंदवली असून, एकूण कमाई €४.९ दशलक्ष झाली आहे. मात्र, याच काळात कंपनीला €५९.२ दशलक्ष चा ऑपरेटिंग लॉस सहन करावा लागला आहे. या नुकसानीत लिस्टिंगचा खर्च आणि शेअर-आधारित भरपाईचा समावेश असला तरी, क्वांटम इन्फ्रास्ट्रक्चर उभारणीचा खर्च खूप मोठा असल्याचे हे स्पष्ट संकेत आहेत.
गुंतवणूकदारांसाठी काय महत्त्वाचे?
गुंतवणूकदारांसाठी सर्वात मोठे आव्हान म्हणजे 'कॉन्ट्रॅक्ट' आणि 'पेमेंट' मधील कालावधी. सध्या करार झाल्यानंतर पैसे हातात येण्यासाठी १२ महिन्यांपेक्षा जास्त वेळ लागतो. कंपनीकडे €७०.४ दशलक्ष चा भक्कम पाइपलाइन बिझनेस आहे, ज्यामध्ये Saudi Aramco आणि Crédit Agricole सारख्या बड्या कंपन्यांशी असलेले करार तसेच सरकारी ग्रँट्सचा समावेश आहे. मात्र, ही 'बुक केलेली' रक्कम प्रत्यक्ष कॅश फ्लोमध्ये रूपांतरित करणे हे कंपनीपुढील मुख्य काम असेल.
भविष्यातील धोरण
सध्या Pasqal कडे ७ क्वांटम प्रोसेसर असून, फ्रान्स आणि कॅनडामध्ये मिळून १३ मशीन तयार करण्याची वार्षिक क्षमता आहे. भविष्यातील भांडवली खर्च या क्षमतेच्या विस्तारावर केंद्रित असेल. तसेच, Google Cloud आणि Microsoft Azure सारख्या क्लाउड प्लॅटफॉर्म्सद्वारे आपल्या सेवा जगभरातील वापरकर्त्यांपर्यंत पोहोचवण्याचा कंपनीचा मानस आहे. येणाऱ्या तिमाहींमध्ये कंपनी किती लवकर आपल्या करारांचे महसुलात रूपांतर करते आणि आपला खर्च नियंत्रणात ठेवते, यावरच कंपनीच्या व्यावसायिक यशाचे मोजमाप होईल.