सहमतीने सुरू असलेल्या नात्यातील शारीरिक संबंधांना, नाते तुटल्यानंतर 'रेप' म्हणता येणार नाही, असा महत्त्वपूर्ण निकाल Supreme Court ने दिला आहे. वैयक्तिक वादासाठी कायद्याचा वापर वाढल्याचे निरीक्षण नोंदवत न्यायालयाने या प्रवृत्तीवर ताशेरे ओढले आहेत.
Supreme Court ने दिलेल्या या निकालात स्पष्ट केले आहे की, केवळ वैयक्तिक नाती संपुष्टात आली म्हणून आधी झालेल्या संमतीपूर्ण शारीरिक संबंधांना आता गुन्ह्याच्या चौकटीत अडकवता येणार नाही. नाते तुटल्यानंतर कुरघोडी करण्यासाठी कायद्याचा वापर करण्याच्या वाढत्या घटनांवर न्यायालयाने चिंता व्यक्त केली आहे.
न्या. बी. व्ही. नागरत्ना यांचे निरीक्षण
न्यायमूर्ती बी. व्ही. नागरत्ना यांनी सुनावणीदरम्यान स्पष्ट केले की, पूर्वीच्या संमतीपूर्ण संबंधांना गुन्हेगारी स्वरूप दिल्यास, खऱ्या अर्थाने होणाऱ्या लैंगिक अत्याचारांच्या प्रकरणांकडे दुर्लक्ष होऊ शकते. न्यायव्यवस्था ही वैयक्तिक सूड घेण्याचे साधन नाही, असेही त्यांनी ठळकपणे नमूद केले.
नेमके प्रकरण काय होते?
केरळमधील एका प्रकरणात ७ वर्षांच्या नात्यानंतर, फसवणुकीचा आरोप करत पीडितेने बलात्काराची तक्रार नोंदवली होती. मात्र, अशा प्रकरणांकडे गुन्हेगारी दृष्टिकोनातून पाहिल्यामुळे आरोपीवर कायमस्वरूपी कलंक लागण्याची शक्यता असते. या निर्णयामुळे आता संमती (Consent) आणि फसवणूक यांमधील सीमारेषा अधिक स्पष्ट झाली असून, भविष्यात कायद्याचा दुरुपयोग रोखण्यासाठी हा निकाल एक महत्त्वपूर्ण दिशादर्शक ठरेल.