पवनराजे निंबाळकर हत्या प्रकरणात माजी मंत्री पद्मसिंह पाटील यांची निर्दोष सुटका झाल्याने CBI ने मुंबई उच्च न्यायालयात धाव घेतली आहे. जून २०२६ चा सत्र न्यायालयाचा निकाल CBI ने कोर्टात आव्हानित केला आहे.
केंद्रीय अन्वेषण विभागाने (CBI) २००६ मधील काँग्रेस नेते पवनराजे निंबाळकर आणि त्यांचे वाहनचालक समद काझी यांच्या हत्याकांड प्रकरणात माजी मंत्री पद्मसिंह पाटील यांच्या निर्दोष सुटकेला मुंबई उच्च न्यायालयात आव्हान दिले आहे. २० जून २०२६ रोजी मुंबईतील सत्र न्यायालयाने पुराव्यांच्या अभावी पाटील आणि इतर सात आरोपींची सर्व आरोपातून मुक्तता केली होती. हा निर्णय कायद्याच्या दृष्टीने सदोष असल्याचे सांगत CBI ने आता उच्च न्यायालयात धाव घेतली आहे.
सुमारे दोन दशकांपासून सुरू असलेल्या या खटल्याचा उगम ३ जून २००६ रोजी नवी मुंबईतील कळंबोली येथे झालेल्या दुहेरी हत्येतून झाला. हे प्रकरण सुरुवातीला स्थानिक पोलिसांकडे होते, मात्र नंतर पीडित कुटुंबाच्या तक्रारीनंतर ते CBI कडे सोपवण्यात आले होते.
केवळ CBI च नव्हे, तर पवनराजे निंबाळकर यांच्या पत्नी आनंदीदेवी निंबाळकर यांनीही सत्र न्यायालयाच्या निर्णयाविरुद्ध स्वतंत्र अपील दाखल केले आहे. न्यायमूर्ती एस.व्ही. कोतवाल यांच्या खंडपीठासमोर आता या सर्व याचिकांवर एकत्रित सुनावणी होणार असून, या प्रकरणाचा कायदेशीर लढा पुन्हा एकदा तीव्र झाला आहे.