देशातील नामांकित हॉस्पिटल AIIMS ने Pentagon Labs Ltd वर मोठी कारवाई केली आहे. आयव्ही फ्लूइडमध्ये (IV Fluid) वारंवार होणाऱ्या दूषिततेमुळे कंपनीला सप्टेंबर २०२७ पर्यंत सर्व करारांतून बॅन करण्यात आले आहे.
नवी दिल्लीतील एम्स (AIIMS) रुग्णालयाने Pentagon Labs Ltd वर २ वर्षांची बंदी घातली असून हा निर्णय २६ सप्टेंबर २०२७ पर्यंत लागू असेल. या निर्णयामुळे कंपनीला आता एम्सला कोणतीही वैद्यकीय उत्पादने पुरवता येणार नाहीत. रुग्णालयाकडून पुरवल्या जाणाऱ्या आयव्ही (IV) फ्लूइडमध्ये वारंवार बुरशी आणि इतर अशुद्ध घटक आढळल्याने हा कडक निर्णय घेण्यात आला आहे.
दर्जाबाबत गंभीर त्रुटी
वैद्यकीय क्षेत्रात औषधांचा दर्जा अत्यंत महत्त्वाचा असतो. एम्सने प्रामुख्याने 'रिंगर लॅक्टेट' (Ringer Lactate) आणि 'मॅनिटॉल' (Mannitol) सोल्यूशन्समध्ये दोष असल्याचे स्पष्ट केले आहे. कंपनीला याआधीही अनेकदा ताकीद देण्यात आली होती, मात्र उत्पादनांच्या दर्जात कोणतीही सुधारणा झाली नाही, असे एम्सने नमूद केले आहे.
ऑगस्ट महिन्यात झालेल्या सुनावणीदरम्यान, कंपनीच्या प्रतिनिधींनी हे दोष लॉजिस्टिक आणि वाहतुकीमुळे असल्याचे सांगून बचावाचा प्रयत्न केला. मात्र, एम्स प्रशासनाने हा युक्तिवाद फेटाळून लावला. उत्पादनाची सुरक्षितता आणि दर्जाची पूर्ण जबाबदारी ही उत्पादकाचीच असते, असे एम्सने ठणकावून सांगितले.
कायदेशीर पेच आणि भविष्यातील आव्हाने
या बंदीच्या आधीही कंपनीचा एम्सशी वाद सुरू होता. कंपनीने यापूर्वीच्या करारांच्या समाप्तीविरुद्ध दिल्ली उच्च न्यायालयात (Delhi High Court) दाद मागितली होती. न्यायालयाच्या आदेशानंतर एम्सने अंतर्गत चौकशी केली, ज्यात पुन्हा एकदा उत्पादनांमध्ये त्रुटी आढळल्या. यामुळे कंपनीला हा मोठा झटका बसला आहे.
एम्ससारख्या मोठ्या सरकारी संस्थांकडून मिळणारी कंत्राटे ही औषध कंपन्यांच्या महसुलाचा आणि प्रतिष्ठेचा एक महत्त्वाचा भाग असतात. आता या बंदीमुळे इतर सरकारी आरोग्य विभागांकडूनही कंपनीच्या रेकॉर्डची तपासणी होण्याची शक्यता आहे. कंपनीला आपला व्यवसाय पूर्ववत करण्यासाठी आता उत्पादन प्रक्रियेत आणि दर्जा तपासणीमध्ये (Quality Control) मोठे बदल करावे लागतील.