भारतात आता घाऊक किंमत निर्देशांकाऐवजी (WPI) उत्पादक किंमत निर्देशांक (PPI) वापरून महागाई मोजली जाणार आहे. यामुळे कंपन्यांना फॅक्टरी गेटवरील किमती आणि सेवा क्षेत्राचाही अचूक अंदाज येईल. यामुळे अर्थव्यवस्थेतील महागाईचे चित्र अधिक स्पष्ट होण्यास मदत होईल.
काय बदलले?
केंद्र सरकारने आता महागाई मोजण्यासाठी एक मोठे पाऊल उचलले आहे. आतापर्यंत घाऊक किंमत निर्देशांक (Wholesale Price Index - WPI) वापरला जात होता, पण आता याऐवजी उत्पादक किंमत निर्देशांक (Producer Price Index - PPI) वापरला जाईल. वाणिज्य आणि उद्योग मंत्रालयाच्या अखत्यारीतील 'ऑफिस ऑफ द इकॉनॉमिक ॲडव्हायझर' (Office of the Economic Adviser) या बदलावर काम करत आहे. यासाठी 2022-23 हे वर्ष बेस इयर (Base Year) म्हणून निश्चित केले आहे. या बदलामुळे अर्थव्यवस्थेतील किमतींच्या हालचाली अधिक अचूकपणे आणि आधुनिक पद्धतीने ट्रॅक करता येतील.