हवामान विभागाने (IMD) मान्सूनच्या माघारीत विलंब झाल्याचे जाहीर केले आहे. मध्य आणि उत्तर भारतातील अतिवृष्टीमुळे खरिपाच्या पिकांचे नुकसान होण्याची शक्यता असून, याचा थेट परिणाम अन्नधान्याच्या महागाईवर होऊ शकतो.
भारतीय हवामान विभागाने (India Meteorological Department) स्पष्ट केले आहे की, सप्टेंबरच्या मध्यावर होणारी नैऋत्य मान्सूनची माघार यावर्षी लांबणीवर पडली आहे. पश्चिम बंगाल, झारखंड आणि ओडिशाच्या किनारपट्टीवर तयार झालेल्या कमी दाबाच्या क्षेत्रामुळे मध्य आणि उत्तर भारतात मुसळधार पाऊस सुरू आहे. ही स्थिती मान्सूनच्या परतण्यातील मुख्य अडथळा ठरत आहे.
गुंतवणूकदारांसाठी काय आहेत धोके?
१. शेती क्षेत्रावर परिणाम: पिकांच्या काढणीचा हा महत्त्वाचा काळ आहे. अशा वेळी होणारा अवकाळी पाऊस पिकांची गुणवत्ता बिघडू शकतो. यामुळे उत्पादनावर परिणाम होऊन अन्नधान्याच्या किमती वाढण्याची शक्यता नाकारता येत नाही.
२. पायाभूत सुविधा आणि लॉजिस्टिक्स: दिल्लीसह मध्य प्रदेश, छत्तीसगड आणि उत्तराखंडमध्ये मुसळधार पावसामुळे पाणी साचण्याचे प्रकार घडत आहेत. यामुळे वाहतुकीत अडथळे आणि बांधकामाची कामे थांबल्याने सप्लाय चेनवर परिणाम होऊ शकतो.
सध्याची स्थिती पाहता, मान्सून पूर्णपणे माघारी फिरायला अजून काही दिवसांचा अवधी लागणार असल्याचे संकेत हवामान विभागाने दिले आहेत. त्यामुळे आगामी काळातील पावसाचे आकडे आणि त्याचा ग्रामीण मागणीवर (Rural Demand) होणारा परिणाम याकडे बाजाराचे लक्ष लागून आहे.