U.S. Federal Reserve चे चेअरमन केविन वॉर्श २८ ऑगस्ट रोजी जॅक्सन होल येथे महत्त्वाचे भाषण करणार आहेत. वाढती महागाई आणि व्याजाच्या दरांबाबत ते काय भूमिका घेतात, यावर जागतिक बाजाराचे भवितव्य अवलंबून आहे.
जॅक्सन होल इकॉनॉमिक पॉलिसी सिम्युझियम हे जागतिक अर्थव्यवस्थेसाठी सर्वात महत्त्वाचे व्यासपीठ मानले जाते. यावर्षी २७ ते २९ ऑगस्ट २०२६ दरम्यान होणाऱ्या या परिषदेत सर्वांच्या नजरा फेडरल रिझर्व्हचे नवीन चेअरमन केविन वॉर्श यांच्यावर आहेत. २८ ऑगस्टला होणारे त्यांचे पहिले भाषण केवळ धोरणात्मक संकेतच देणार नाही, तर बाजारातील अस्थिरतेला पूर्णविराम देईल का, याची गुंतवणूकदार वाट पाहत आहेत.
धोरणातील अनिश्चिततेचे संकट
मे २०२६ मध्ये पदभार स्वीकारल्यापासून केविन वॉर्श यांनी पारंपारिक 'फॉरवर्ड गायडन्स' पद्धतीपासून दूर राहणे पसंत केले आहे. यामुळे बाजारात गोंधळाची स्थिती निर्माण झाली असून, महागाईचा २% चा टप्पा गाठण्यासाठी फेड नेमकी काय पावले उचलणार, याचे कोणतेही ठोस भाकीत वर्तवणे कठीण झाले आहे. फेडरल फंड्स रेट सध्या ३.५% ते ३.७५% च्या दरम्यान आहेत, तर आगामी काळात दर वाढीची शक्यता ४०% वर्तवली जात आहे.
भारतीय बाजारावर काय परिणाम होईल?
अमेरिकन ट्रेझरी यील्ड वाढल्यास त्याचा थेट फटका भारतीय बाजाराला बसतो. जर वॉर्श यांनी व्याजदर दीर्घकाळ उच्च पातळीवर राहण्याचे संकेत दिले, तर परकीय गुंतवणूकदार (FIIs) भारतीय बाजारपेठेतून आपला पैसा काढून घेऊ शकतात. तसेच, याचा दबाव भारतीय रुपयावरही येण्याची शक्यता नाकारता येत नाही.
आता गुंतवणूकदारांचे लक्ष केवळ महागाईच्या आकडेवारीवर नाही, तर फेडरल रिझर्व्हमध्ये अंतर्गत मतभेद आणि वॉर्श हे भविष्यातील धोरणांचा स्पष्ट आराखडा सादर करणार का, याकडे लागून आहे.