BMW India: ग्राहकांना धक्का! २०२६ मध्ये चौथ्यांदा होणार गाड्या महाग, जाणून घ्या कारण

दरवाढीचे नेमके कारण काय?

लक्झरी ऑटोमोबाईल क्षेत्रात सध्या खर्चाचा मोठा दबाव दिसून येत आहे. कंपनीच्या मते, भारतीय रुपयाचे युरोच्या तुलनेत कमकुवत होणे हे या दरवाढीचे मुख्य कारण आहे. कच्चा माल आणि लॉजिस्टिक खर्चात झालेली भरमसाठ वाढ यामुळे कंपनीला हा निर्णय घ्यावा लागला आहे. २०२६ मध्ये याआधी तीनदा किमती वाढवण्यात आल्या असून, आतापर्यंत BMW आणि MINI गाड्यांच्या किमतीत सुमारे ५% नी वाढ झाली आहे.

मार्जिनवर परिणाम

चलन बाजारातील अस्थिरतेचा फटका कंपनीच्या प्रॉफिट मार्जिनवर थेट पडत आहे. कंपनीच्या माहितीनुसार, युरोच्या तुलनेत रुपयाच्या प्रत्येक एका रुपयाच्या घसरणीमुळे कंपनीच्या मार्जिनमध्ये १% पर्यंत घट होऊ शकते. केवळ भारतातच नव्हे, तर जागतिक स्तरावरही BMW AG ला भू-राजकीय तणाव आणि मागणीतील घट यामुळे आपल्या प्रॉफिट आऊटलूकमध्ये बदल करावा लागला आहे.

लोकल मॅन्युफॅक्चरिंगवर भर

या सर्व आव्हानांच्या दरम्यान, कंपनीने आपला 'ग्रोथ प्लॅन' कायम ठेवला आहे. भारतात २०,००० पेक्षा जास्त गाड्या विक्रीचे उद्दिष्ट गाठण्यासाठी, कंपनीने चेन्नई प्लांटमध्ये आपली फ्लॅगशिप इलेक्ट्रिक सेडान i7 चे स्थानिक उत्पादन (Local Assembly) सुरू केले आहे. जर्मनीबाहेर अशा प्रकारे i7 चे उत्पादन करणारा भारत हा एकमेव देश ठरला आहे. स्थानिक स्तरावर उत्पादन वाढवल्यामुळे आयातीवर अवलंबून राहणे कमी होईल आणि भविष्यात किमतींवर नियंत्रण ठेवण्यास मदत होऊ शकते.