भारतीय हवाई दल (IAF) आपल्या ताफ्यातील कमतरता भरून काढण्यासाठी ११४ मल्टी-रोल फायटर जेट्स खरेदी करण्याच्या तयारीत आहे. मार्च २०२७ ची डेडलाईन निश्चित करण्यात आली असून, या प्रकल्पामुळे देशांतर्गत संरक्षण उत्पादनाला मोठी चालना मिळणार आहे.
भारतीय हवाई दल (IAF) सध्या आपल्या ताफ्याची ताकद वाढवण्यासाठी मिशन मोडवर काम करत आहे. सध्या हवाई दलाकडे २९ स्क्वॉड्रन्स आहेत, तर गरजेची संख्या ४२ आहे. ही मोठी दरी भरून काढण्यासाठी ११४ मल्टी-रोल फायटर एअरक्राफ्ट्स (MRFA) खरेदी करण्याचा निर्णय घेण्यात आला असून मार्च २०२७ पर्यंत करार पूर्ण करण्याचे उद्दिष्ट आहे.
'मेक इन इंडिया'वर भर
या कराराचे खास वैशिष्ट्य म्हणजे थेट आयातीऐवजी भारतातच उत्पादनावर (Indigenization) दिला जाणारा भर. संरक्षण सचिव राजेश कुमार सिंग यांनी स्पष्ट केले की, सध्या निविदांच्या मूल्यमापनाचे काम वेगाने सुरू आहे. या विमानांची जोडणी आणि त्यातील शस्त्रास्त्रे भारतीय सिस्टिम्सचा वापर करूनच बनवली जाणार आहेत.
गुंतवणूकदारांसाठी काय आहे संधी आणि धोके?
संरक्षण क्षेत्रातील शेअर्सनी गेल्या वर्षभरात मोठी मजल मारली आहे. मात्र, गुंतवणूकदारांनी हे लक्षात घेतले पाहिजे की, अशा मोठ्या करारांमध्ये किंमत वाटाघाटी (Price Negotiations) आणि अंमलबजावणीला वेळ लागू शकतो. जर प्रकल्पात काही विलंब झाला किंवा खर्चात वाढ झाली, तर त्याचा परिणाम संबंधित कंपन्यांच्या प्रॉफिट मार्जिनवर होऊ शकतो.
धोरणात्मक पावले
केवळ परदेशी विमानांवर अवलंबून न राहता, भारतीय हवाई दल 'Advanced Medium Combat Aircraft' (AMCA) सारख्या स्वदेशी कार्यक्रमांवरही तितकाच भर देत आहे. येत्या काळात या करारातील मुख्य भागीदार कोण असेल आणि अटी काय असतील, यावर बाजाराचे लक्ष लागून राहील.