BonV Aero: भारतीय लष्कराच्या ताफ्यात ४५ नवीन लॉजिस्टिक ड्रोन, संरक्षण क्षेत्रात स्वदेशी तंत्रज्ञानाचा दबदबा

भारतीय लष्कराच्या ईस्टर्न कमांडने दुर्गम पर्वतीय भागात रसद पुरवण्यासाठी ४५ प्रगत लॉजिस्टिक ड्रोन्सचा समावेश केला आहे. रस्ते वाहतुकीला अडथळा ठरणारे खराब हवामान, दरडी कोसळणे किंवा पूर यांसारख्या संकटांवर मात करण्यासाठी हे ड्रोन गेमचेंजर ठरणार आहेत.

डोंगराळ भागात सज्जता

हे ड्रोन्स १५,००० फूट उंचीवरही १० किलो वजन सहजपणे वाहून नेऊ शकतात. हे ड्रोन्स ४५ मिनिटे सलग उड्डाण करू शकतात, ज्यामुळे सीमेवरील सैनिकांपर्यंत आवश्यक रसद पोहोचवणे सोपे होईल. मागील तीन वर्षांत कंपनीने भारतीय सशस्त्र दलांना ७० ड्रोन्स पुरवले आहेत आणि लष्करी जवानांना विशेष प्रशिक्षणही दिले आहे.

संरक्षण क्षेत्रात 'आत्मनिर्भर' भारताचा जोर

भारत सरकार आता परकीय तंत्रज्ञानावरील अवलंबित्व कमी करून स्थानिक स्टार्टअप्सना प्रोत्साहन देत आहे. याचाच एक भाग म्हणून संरक्षण मंत्रालयाने २,७०० हून अधिक लॉजिस्टिक ड्रोन्ससाठी निविदा (Tenders) काढल्या आहेत.

या क्षेत्रातील वाढती प्रगती पाहता, आगामी काळात ड्रोन्सची मेंटेनन्स क्षमता आणि इलेक्ट्रॉनिक वॉरफेअरमध्ये त्यांची कामगिरी कशी राहते, याकडे गुंतवणूकदारांचे आणि संरक्षण तज्ज्ञांचे लक्ष लागले आहे.