UN సెక్యూరిటీ కౌన్సిల్ సంస్కరణల విషయంలో భారత్ తన వైఖరిని స్పష్టం చేసింది. కొత్త శాశ్వత సభ్యులకు పూర్తి 'వీటో' అధికారం కల్పించని ఏ ప్రతిపాదననూ భారత్ అంగీకరించబోమని రాయబారి హరీష్ పర్వతనేని తేల్చిచెప్పారు.
ఐక్యరాజ్యసమితి భద్రతా మండలి (UN Security Council) విస్తరణలో భారత్ తన డిమాండ్‌ను మరింత బలంగా వినిపిస్తోంది. కౌన్సిల్‌లో కొత్తగా చేరే శాశ్వత సభ్యులకు పూర్తి స్థాయి 'వీటో' అధికారం కల్పించాల్సిందేనని, లేదంటే ఆ సంస్కరణలు వ్యర్థమని న్యూఢిల్లీ స్పష్టం చేసింది. ఐక్యరాజ్యసమితి జనరల్ అసెంబ్లీలో జరిగిన చర్చలో భారత ప్రతినిధి హరీష్ పర్వతనేని మాట్లాడుతూ, కౌన్సిల్‌లో ఒక క్రమానుగత (Hierarchy) వ్యవస్థను సృష్టించడం వల్ల ప్రస్తుత ప్రపంచ సమస్యలను పరిష్కరించలేమని హెచ్చరించారు.
పాత పద్ధతికి కాలం చెల్లింది
ప్రస్తుతం భద్రతా మండలిలో కొనసాగుతున్న P5 దేశాల (చైనా, ఫ్రాన్స్, రష్యా, యూకే, అమెరికా) ఆధిపత్యం 1945 నాటి పరిస్థితులకు అనుగుణంగా ఉంది. నేటి ప్రపంచ ఆర్థిక, రాజకీయ స్థితిగతులకు ఇది ఏమాత్రం సరిపోదని భారత్ వాదిస్తోంది. కేవలం నామమాత్రపు సభ్యత్వం వల్ల ఏ ప్రయోజనం ఉండదని, సమాన అధికారాలు కల్పించినప్పుడే అంతర్జాతీయ నిర్ణయాల్లో పారదర్శకత ఉంటుందని భారత్ అభిప్రాయపడుతోంది.
2028-29 ఎన్నికలపై ఫోకస్
శాశ్వత సభ్యత్వం కోసం ప్రయత్నాలు కొనసాగిస్తూనే, మరోవైపు 2028-29 కాలానికి నాన్-పర్మినెంట్ సీటు కోసం భారత్ సిద్ధమవుతోంది. వచ్చే జూన్‌లో జరగనున్న ఈ ఎన్నికల్లో తజికిస్థాన్‌తో భారత్ పోటీ పడనుంది. ఇది గెలిస్తే భారత్ కౌన్సిల్‌లో తొమ్మిదోసారి సభ్యునిగా బాధ్యతలు చేపట్టినట్లవుతుంది. ఈ దౌత్యపరమైన విజయాలు అంతర్జాతీయ వాణిజ్య ఒప్పందాలు, దేశ భద్రత మరియు గ్లోబల్ పాలసీలలో భారత్ గళం వినిపించడానికి కీలకమైన వేదికలుగా మారనున్నాయి.