ఆస్ట్రేలియన్ ఇండిపెండెంట్ ఎంపీ Helen Haines వాహన ప్రమాదంలో తీవ్రంగా గాయపడ్డారు. వాంగరాటాలోని ఆమె కార్యాలయం వెలుపల ఈ ఘటన చోటుచేసుకోగా, నిందితుడిని పోలీసులు అదుపులోకి తీసుకున్నారు. ప్రస్తుతం కౌంటర్ టెర్రరిజం టాస్క్‌ఫోర్స్ దీనిపై దర్యాప్తు చేస్తోంది.
ఆస్ట్రేలియాలోని విక్టోరియా రాష్ట్రం, వాంగరాటా పట్టణంలో ఉన్న తన నియోజకవర్గ కార్యాలయం బయట జరిగిన రోడ్డు ప్రమాదంలో స్వతంత్ర ఫెడరల్ ఎంపీ Helen Haines తీవ్రంగా గాయపడ్డారు. 65 ఏళ్ల ఎంపీని వెంటనే ఎయిర్‌లిఫ్ట్ చేసి అత్యవసర వైద్యం అందిస్తున్నారు. ప్రస్తుతం ఆమె ఆరోగ్యం విషమంగా ఉందని సమాచారం.
నిందితుడి అరెస్ట్
ఈ ఘటనపై ఆస్ట్రేలియా ప్రధాని Anthony Albanese స్పందించారు. Tarrawingee కి చెందిన 43 ఏళ్ల నిందితుడిని అక్కడికక్కడే ప్రజలు పట్టుకుని పోలీసులకు అప్పగించారు. ప్రజలకు ఎటువంటి ముప్పు లేదని అధికారులు స్పష్టం చేసినప్పటికీ, ఈ కేసులో 'జాయింట్ కౌంటర్ టెర్రరిజం టాస్క్‌ఫోర్స్' విచారణ చేపట్టడం ఈ ఘటన తీవ్రతను తెలియజేస్తోంది.
పెరిగిన దాడుల ముప్పు
రాజకీయ నాయకులపై పెరుగుతున్న దాడుల అంశం ఇప్పుడు ఆస్ట్రేలియాలో చర్చనీయాంశమైంది. ప్రభుత్వ గణాంకాల ప్రకారం, గత ఆర్థిక సంవత్సరంలో ప్రజా ప్రతినిధులపై జరిగిన దాడులు, బెదిరింపుల కేసులు 951 నుండి 1,067 కి పెరిగాయి. ముఖ్యంగా రీజనల్ ఏరియాల్లో పనిచేసే ప్రజా ప్రతినిధుల భద్రతపై ఆందోళనలు వ్యక్తమవుతున్నాయి.
Home Affairs Minister Tony Burke ప్రస్తుతం విచారణ ప్రారంభ దశలోనే ఉందని, నిందితుడి నేపథ్యం, దాడికి గల కారణాలను లోతుగా పరిశీలిస్తున్నామని తెలిపారు. 2019 నుండి Indi నియోజకవర్గానికి ఎంపీగా సేవలు అందిస్తున్న Helen Haines పై జరిగిన ఈ దాడి ఆస్ట్రేలియా రాజకీయ వర్గాల్లో కలకలం రేపింది.