దేశంలోని ఎయిర్పోర్ట్ ఆపరేటర్లకు ఎయిర్లైన్స్ కంపెనీల్లో వాటాలు కొనుగోలు చేసే అవకాశం కల్పించాలని కేంద్ర పౌర విమానయాన శాఖ పరిశీలిస్తోంది. అయితే, ఈ నిర్ణయం వల్ల కాంపిటీషన్ దెబ్బతినే ప్రమాదం ఉందన్న ఆందోళనలు వ్యక్తమవుతున్నాయి.
దేశంలో ఏవియేషన్ రంగాన్ని మరింత విస్తరించాలని లక్ష్యంగా పెట్టుకున్న ప్రభుత్వం, కీలక నిర్ణయానికి సిద్ధమవుతోంది. 2047 నాటికి దేశవ్యాప్తంగా విమానాశ్రయాల సంఖ్యను 350కి పెంచాలనే లక్ష్యంతో, ఎయిర్పోర్ట్ ఆపరేటర్లు ఎయిర్లైన్స్ కంపెనీల్లో వాటాలు (Equity Stakes) కొనుగోలు చేసేలా నిబంధనలను సడలించే అంశాన్ని ప్రభుత్వం పరిశీలిస్తోంది. దీనిపై పౌర విమానయాన శాఖ మంత్రి కె. రామ్మోహన్ నాయుడు కూడా స్పష్టతనిచ్చారు.
అసలు సవాల్ ఏంటి?
ఇప్పటివరకు విమానాశ్రయాల నిర్వహణను, ఎయిర్లైన్స్ సర్వీసులను వేరుగానే చూశారు. ఎందుకంటే ఎయిర్పోర్ట్స్ అనేవి రన్వే యాక్సెస్, ల్యాండింగ్ స్లాట్లు, టెర్మినల్ సదుపాయాలను అందించే మోనోపలీ సంస్థలు. ఒకవేళ ఎయిర్పోర్ట్ ఆపరేటరే సొంతంగా ఒక ఎయిర్లైన్ నడిపితే, తమ సంస్థకే ప్రాధాన్యత ఇస్తూ ఇతర ఎయిర్లైన్స్కు తక్కువ స్లాట్లు ఇవ్వడం లేదా గ్రౌండ్ హ్యాండ్లింగ్ ఖర్చులను మార్చడం వంటివి చేసే రిస్క్ ఉంటుంది.
నిబంధనలు ఏమంటున్నాయి?
ప్రస్తుతం ఢిల్లీ, ముంబై వంటి ప్రధాన విమానాశ్రయాల ఒప్పందాల (OMDA) ప్రకారం, క్రాస్-ఓనర్షిప్పై ఆంక్షలు ఉన్నాయి. ఈ నేపథ్యంలో, ప్రభుత్వం ఒకవేళ గ్రీన్ సిగ్నల్ ఇస్తే, పక్షపాతం లేకుండా చూడటానికి Airport Economic Regulatory Authority (AERA) మరియు Directorate General of Civil Aviation (DGCA) వంటి సంస్థలు ప్రత్యేకమైన 'ఆర్మ్స్ లెంత్' (Arm's length) రూల్స్ తీసుకురావాల్సి ఉంటుంది.
ప్రస్తుతానికి ఇది కేవలం సంప్రదింపుల దశలోనే ఉంది. పెట్టుబడిదారుల నుంచి వస్తున్న స్పందన మరియు రంగంలో పోటీ సమతుల్యతను బట్టి ఫైనల్ డెసిషన్ ఉంటుందని అధికారులు చెబుతున్నారు.