Airports Authority of India (AAI) కీలక నిర్ణయం తీసుకుంది. దేశవ్యాప్తంగా ఉన్న 11 విమానాశ్రయాలను 5 వ్యూహాత్మక బండిల్స్‌గా విభజించి, డిసెంబర్ 2026లో గ్లోబల్ బిడ్డింగ్‌కు సిద్ధమవుతోంది. సుమారు ₹8,622 కోట్ల ప్రైవేట్ పెట్టుబడులను ఆకర్షించడమే లక్ష్యంగా ఈ ప్రాజెక్టును ప్రభుత్వం చేపట్టింది.
కొత్త వ్యూహం ఇదే..
గతంలో విడివిడిగా ఎయిర్‌పోర్టులను అమ్మడం వల్ల కొద్దిమంది మాత్రమే లాభపడ్డారన్న విమర్శల నేపథ్యంలో, ఈసారి AAI 'బండిల్ మోడల్'ను ఎంచుకుంది. దీని ద్వారా బిజీగా ఉండే పెద్ద విమానాశ్రయాలతో పాటు, అభివృద్ధి చెందుతున్న చిన్న ఎయిర్‌పోర్టులను కలిపి ఒకే క్లస్టర్‌గా వేలం వేయనున్నారు. 50 ఏళ్ల లీజు ప్రాతిపదికన ఈ ఒప్పందాలు జరగనున్నాయి.
నిబంధనల్లో మార్పులు
ఈసారి మార్కెట్లో గుత్తాధిపత్యాన్ని (Market Concentration) తగ్గించేందుకు ప్రభుత్వం కఠినమైన నిబంధనలు తీసుకొచ్చింది. ఒకే సంస్థ ఎన్ని బండిల్స్ కొనుగోలు చేయవచ్చో పరిమితులు విధించింది. దీనివల్ల Adani Group, GMR Group వంటి పెద్ద ప్లేయర్లతో పాటు, JSW Group వంటి సంస్థలకు కూడా సమానమైన పోటీ అవకాశం దక్కుతుంది.
పెట్టుబడి లక్ష్యం
ఈ మొత్తం ప్రాజెక్టు ద్వారా ₹8,622 కోట్ల ప్రైవేట్ ఫండ్స్ వస్తాయని అంచనా. ఈ నిధులతో విమానాశ్రయాల ఆధునీకరణ, ప్రయాణికులకు మెరుగైన సేవలు, మరియు సామర్థ్య విస్తరణ చేపట్టనున్నారు. ప్రస్తుతం దుబాయ్, సింగపూర్ వంటి నగరాల్లో అంతర్జాతీయ ఇన్వెస్టర్లతో రోడ్‌షోలు నిర్వహిస్తున్నారు.
ఎయిర్‌పోర్టుల క్లస్టర్లు ఇవే:
- వారణాసి, గయా, కుషీనగర్
- అమృత్‌సర్, కాంగ్రా
- భువనేశ్వర్, హుబ్బళ్లి
- రాయ్‌పూర్, ఔరంగాబాద్
- తిరుచురాపల్లి, తిరుపతి
2027 ఆర్థిక సంవత్సరం ముగిసేలోపు ఈ ప్రక్రియను పూర్తి చేయాలని ప్రభుత్వం లక్ష్యంగా పెట్టుకుంది. ఈ బిడ్డింగ్ ప్రక్రియ ఇన్వెస్టర్లకు ఎలాంటి లాభాలను తెచ్చిపెడుతుందో వేచి చూడాలి.