2027 జనవరి 1 నుంచి ఈ-కామర్స్ ప్లాట్ఫామ్స్పై కేంద్ర ప్రభుత్వం కఠిన నిబంధనలు అమలు చేయనుంది. ఇకపై ఏదైనా డిస్కౌంట్ ప్రకటించినప్పుడు, గత 30 రోజుల్లో ఆ వస్తువుకు ఉన్న అత్యల్ప ధరను కూడా తప్పనిసరిగా చూపించాలి. ఈ నిర్ణయం వినియోగదారులను మోసపూరిత ధరల నుంచి కాపాడటంతో పాటు, ఆన్లైన్ షాపింగ్ పారదర్శకతను పెంచనుంది.
ఆన్లైన్ షాపింగ్ యాప్స్లో జరిగే ధరల మాయాజాలానికి చెక్ పెట్టేందుకు కేంద్రం 'Consumer Protection (E-Commerce) (Amendment) Rules, 2026'ను సిద్ధం చేసింది. 2025లో నేషనల్ కన్స్యూమర్ హెల్ప్లైన్కు వచ్చిన 17.7 లక్షల ఫిర్యాదులలో 29% వరకు ఈ-కామర్స్ రంగానికి చెందినవే కావడంతో ప్రభుత్వం ఈ నిర్ణయం తీసుకుంది.
ప్రమోషనల్ ప్రైసింగ్పై దెబ్బ
ఇకపై ప్లాట్ఫామ్స్ అడ్డగోలుగా ధరలను పెంచి, ఆపై భారీ డిస్కౌంట్ ఇస్తున్నట్లు చూపించడం కుదరదు. ఏదైనా ఆఫర్ ప్రకటించినప్పుడు, ఆ వస్తువు గత 30 రోజుల్లో విక్రయించిన అత్యల్ప ధరను కచ్చితంగా ప్రదర్శించాలి. ఇది పండగ సీజన్ సేల్స్పై మరియు కంపెనీల కన్వర్షన్ రేట్లపై ప్రభావం చూపవచ్చు.
సెర్చ్ రిజల్ట్స్ & స్పాన్సర్డ్ లిస్టింగ్స్
సెర్చ్ రిజల్ట్స్ను మ్యానిపులేట్ చేసి, కొన్ని ప్రోడక్ట్స్ను మాత్రమే పైన చూపించే పద్ధతులకు కూడా బ్రేక్ పడనుంది. స్పాన్సర్డ్ యాడ్స్ను చాలా స్పష్టంగా, సాధారణ సెర్చ్ రిజల్ట్స్ నుంచి వేరుగా కనిపించేలా ఉంచాలని రూల్స్ చెబుతున్నాయి. దీనివల్ల పెయిడ్ ప్రమోషన్ల ఆదాయ నమూనాలపై మార్పులు వచ్చే అవకాశం ఉంది.
కంప్లయన్స్ ఖర్చులు పెరుగుతాయా?
కంపెనీలు తమ ఫిర్యాదుల పరిష్కార వ్యవస్థను నేరుగా 'National Consumer Helpline'తో అనుసంధానించాలి. అంతేకాకుండా 2023 నాటి 'Dark Pattern Guidelines'ను అనుసరిస్తూ ప్రతి ఏటా సెల్ఫ్-ఆడిట్ రిపోర్ట్స్ ఇవ్వాలి. ఈ కొత్త నిబంధనల వల్ల ఐటీ సిస్టమ్స్, కస్టమర్ సపోర్ట్ వంటి వాటిపై అదనపు భారం పడుతుందని, ఇది ఇన్వెస్టర్లు గమనించాల్సిన కీలక అంశమని మార్కెట్ నిపుణులు భావిస్తున్నారు.