Tata Sons యాన్యువల్ జనరల్ మీటింగ్ (AGM) నిర్వహణలో తీవ్ర జాప్యం జరుగుతోంది. సరైన కోరం (Quorum) లేకపోవడంతో సమావేశం నిర్వహించడం సవాలుగా మారింది. దీనివల్ల ఎన్ చంద్రశేఖరన్ పునర్నియామకంతో పాటు కీలక నిర్ణయాలు నిలిచిపోయాయి.
ఆగస్టు 18న జరగాల్సిన Tata Sons AGMకి అవసరమైన కోరం లభించలేదు. రూల్స్ ప్రకారం, సర్ రతన్ టాటా ట్రస్ట్ మరియు సర్ దొరాబ్జీ టాటా ట్రస్ట్ ప్రతినిధులు ఇద్దరూ హాజరవ్వాలి. అయితే, మహారాష్ట్ర ఛారిటీ కమిషనర్ విధించిన ఆంక్షల కారణంగా రతన్ టాటా ట్రస్ట్ ప్రతినిధులు నిర్ణయాల్లో పాల్గొనలేకపోతున్నారు. ఫలితంగా కంపెనీ Registrar of Companies నుంచి 3 నెలల గడువు పొడిగింపును కోరాల్సి వచ్చింది.
ఎన్ చంద్రశేఖరన్ పునర్నియామకం
ఈ సమావేశం ఎన్ చంద్రశేఖరన్ డైరెక్టర్గా పునర్నియామకానికి అత్యంత కీలకం. అయితే బోర్డులో అంతర్గత విభేదాలు కూడా రచ్చకెక్కినట్లు కనిపిస్తోంది. టాటా ట్రస్ట్స్ చైర్మన్ నోయల్ టాటా, చంద్రశేఖరన్ నియామకాన్ని, అలాగే కంపెనీని లిస్ట్ చేయాలనే ప్రతిపాదనను వ్యతిరేకిస్తున్నట్లు సమాచారం.
NCLT వైపు అడుగులు
ఈ చిక్కుముడిని విప్పేందుకు కంపెనీలు చట్టంలోని సెక్షన్ 97 కింద NCLTని ఆశ్రయించే అవకాశం ఉంది. ఇది ఒక్క సభ్యుడి హాజరుతోనే కోరం పూర్తయినట్లు భావించేలా కోర్టు అనుమతి ఇస్తుంది. కానీ, ఇది న్యాయపరమైన చిక్కులకు దారితీస్తుందని నిపుణులు హెచ్చరిస్తున్నారు. ఛారిటీ కమిషనర్ పెట్టిన ఆంక్షలను దాటవేస్తే, భవిష్యత్తులో ఈ నిర్ణయాలపై న్యాయపోరాటాలు జరిగే రిస్క్ ఉంది.