Kore Digital లో భారీ ఆర్థిక అవకతవకలు జరిగినట్లు మార్కెట్ రెగ్యులేటర్ SEBI గుర్తించింది. సుమారు **₹541 కోట్ల** మేర నిధుల మళ్లింపు, తప్పుడు లెక్కలు చూపించారన్న ఆరోపణలతో కంపెనీ అగ్రశ్రేణి అధికారులపై మార్కెట్లోకి ప్రవేశించకుండా ఆంక్షలు విధించింది.
మార్కెట్ నియంత్రణ సంస్థ సెబీ (SEBI) కోర్ డిజిటల్ లిమిటెడ్ (Kore Digital Limited) పై తీవ్రస్థాయిలో చర్యలకు దిగింది. ఆర్థిక లావాదేవీల్లో భారీ అక్రమాలు జరిగాయని ప్రాథమికంగా గుర్తించిన రెగ్యులేటర్, కంపెనీపై ఇంటర్మ్ ఎక్స్-పార్టీ ఆర్డర్ జారీ చేసింది. 2025-2026 ఆర్థిక సంవత్సరాల్లో కంపెనీ చూపించిన కన్సాలిడేటెడ్ రెవెన్యూలో ఏకంగా 73% అంటే ₹541.3 కోట్ల వరకు తప్పుడు లెక్కలేనని సెబీ అనుమానిస్తోంది.
ఆరోపణల చిట్టా ఇవే..
సెబీ నివేదిక ప్రకారం, కంపెనీ స్టాండలోన్ ఆర్థిక నివేదికల్లో రాబడిని భారీగా పెంచి చూపించారు. ఇందులో భాగంగా Vodafone, Bharti Airtel, Navayuga Engineering వంటి పెద్ద పేర్లతో జరిపిన ₹31.49 కోట్ల లావాదేవీలు అనుమానాస్పదంగా ఉన్నాయని తేల్చింది. అంతేకాకుండా, Kashvee Infra Projects Pvt. Ltd. ద్వారా చూపిన ₹26.42 కోట్ల ఆదాయంపై కూడా సెబీ ప్రశ్నలు లేవనెత్తింది. ఈ సంస్థకు సంబంధించి జీఎస్టీ రిజిస్ట్రేషన్ కూడా రద్దు ప్రక్రియలో ఉండటం, అసలు ఆ సంస్థ ఉనికిలోనే లేకపోవడం గమనార్హం.
నిధుల మళ్లింపు.. సబ్సిడరీల డ్రామా
కంపెనీ నిర్మాణంపై కూడా సెబీ తీవ్ర ఆందోళన వ్యక్తం చేసింది. 2025 ఆర్థిక సంవత్సరంలో కొనుగోలు చేసిన ఆరు సబ్సిడరీ సంస్థలు అస్సలు ఉనికిలోనే లేవని, వాటికి సంబంధించి ఎటువంటి స్టాట్యుటరీ ఫైలింగ్స్ లేవని సెబీ స్పష్టం చేసింది. ఇక మార్చి 2024 లో ప్రిఫరెన్షియల్ ఇష్యూ ద్వారా సేకరించిన ₹40.05 కోట్ల నిధులు కూడా నకిలీ సంస్థలకు మళ్లించారని ఆరోపణలు వస్తున్నాయి.
అధికారులపై కఠిన ఆంక్షలు
ప్రస్తుతానికి కోర్ డిజిటల్ కంపెనీతో పాటు దాని ఎండీ (Managing Director), సీఈఓ (CEO), మరియు సీఎఫ్ఓ (CFO) లపై సెబీ మార్కెట్ ఆంక్షలు విధించింది. వీరు ఇకపై సెక్యూరిటీల కొనుగోలు, అమ్మకాలు లేదా మార్కెట్ నుండి నిధుల సేకరణ చేసే అవకాశం లేదు. తదుపరి విచారణ కోసం ఫోరెన్సిక్ ఆడిటర్ను నియమించడంతో పాటు, ఈ వ్యవహారాన్ని నేషనల్ ఫైనాన్షియల్ రిపోర్టింగ్ అథారిటీ (NFRA) కి కూడా సెబీ రిఫర్ చేసింది.