మార్కెట్ ఇన్ఫ్రాస్ట్రక్చర్ ఇన్స్టిట్యూషన్స్ (MIIs)లో నిపుణుల కొరతను అధిగమించేందుకు SEBI కీలక ప్రతిపాదనలు చేసింది. ఎక్స్ఛేంజీలు, క్లియరింగ్ కార్పొరేషన్ల డైరెక్టర్ల నియామక నిబంధనలను సడలిస్తూనే, CTO, CISO వంటి కీలక పోస్టులకు కఠినమైన ప్రమాణాలను సూచించింది.
మార్కెట్ ఇన్ఫ్రాస్ట్రక్చర్ ఇన్స్టిట్యూషన్స్ (MIIs) అంటే స్టాక్ ఎక్స్ఛేంజీలు, క్లియరింగ్ కార్పొరేషన్లు మరియు డిపాజిటరీల పాలనా విధానాల్లో మార్పులకు SEBI శ్రీకారం చుట్టింది. సెప్టెంబర్ 9, 2026న విడుదల చేసిన ఈ ప్రతిపాదనల ముఖ్య ఉద్దేశ్యం.. నిపుణుల లభ్యతను పెంచడం.
నిబంధనల్లో మార్పులు ఏంటి?
ప్రస్తుత నిబంధనల ప్రకారం, ట్రేడింగ్ సభ్యులతో లేదా బ్రోకర్లతో సంబంధం ఉన్నవారు MIIల బోర్డులలో చేరడానికి అవకాశం లేదు. అయితే, ఇప్పుడు SEBI దీనిని సడలించింది. 'వెల్ డైవర్సిఫైడ్' (Well-diversified) కంపెనీల నుంచి వచ్చే అభ్యర్థులకు మినహాయింపులు ఇవ్వాలని నిర్ణయించింది. ఒక కంపెనీలో ప్రభుత్వ రంగ సంస్థలు మినహా, ఎవరైనా ఒక్కరి వాటా 10% కంటే తక్కువ ఉంటే, ఆ సంస్థను వెల్ డైవర్సిఫైడ్ కంపెనీగా పరిగణిస్తారు.
కీలక పదవులకు ప్రమాణాలు
కేవలం నియామకాలు మాత్రమే కాదు, సంస్థల సాంకేతిక సామర్థ్యాన్ని పెంచేందుకు కూడా SEBI కఠినంగా వ్యవహరిస్తోంది. ముఖ్యంగా CTO (Chief Technology Officer), CISO (Chief Information Security Officer), Compliance Officer, మరియు Chief Risk Officer వంటి నాలుగు కీలక పోస్టుల కోసం ప్రత్యేకమైన 'స్టాండర్డ్ ఆపరేటింగ్ ప్రొసీజర్స్' (SOPs) రూపొందించాలని ఆదేశించింది. ఇందులో కనీస అనుభవం, సర్టిఫికేషన్లు వంటి అంశాలు స్పష్టంగా ఉండాలి.
ఆపరేషనల్ స్టెబిలిటీ
సంస్థల్లో కీలక పోస్టులు ఖాళీగా ఉంటే మార్కెట్ కార్యకలాపాలకు ఆటంకం కలుగుతుందని భావించిన సెబీ, ఏదైనా పోస్ట్ ఖాళీ అయితే 3 నెలల లోపే భర్తీ చేయాలని గడువు విధించింది. ఈ governance ఫ్రేమ్వర్క్పై ప్రజల అభిప్రాయాలను సెప్టెంబర్ 30, 2026 వరకు స్వీకరించనున్నారు.