IPOల ద్వారా సేకరించిన నిధుల వినియోగంపై SEBI కఠిన నిర్ణయాలు తీసుకుంది. ఇకపై కంపెనీలు నిధుల వినియోగంపై పారదర్శకంగా ఉండాలి. లేనిపక్షంలో ప్రమోటర్ల డీమ్యాట్ ఖాతాలను ఫ్రీజ్ చేస్తామని SEBI హెచ్చరిస్తోంది.
మార్కెట్ రెగ్యులేటర్ SEBI తాజాగా విడుదల చేసిన కన్సల్టేషన్ పేపర్ కార్పొరేట్ సంస్థలకు హెచ్చరికగా నిలుస్తోంది. IPO ద్వారా ఇన్వెస్టర్ల నుంచి సేకరించిన నిధులు ఎలా ఖర్చు చేస్తున్నారో వెల్లడించడంలో జాప్యం చేసే కంపెనీలపై కొరడా ఝళిపించేందుకు SEBI సిద్ధమైంది.
నిఘా పెంచేలా కొత్త ప్రతిపాదనలు
ప్రతి IPOకి తప్పనిసరిగా ఒక 'మానిటరింగ్ ఏజెన్సీ'ని నియమించాలనే నిబంధనను SEBI మరింత కఠినతరం చేస్తోంది. ఈ ఏజెన్సీలు నేరుగా స్టాక్ ఎక్స్ఛేంజీలకు నివేదికలు అందించాల్సి ఉంటుంది. ఒకవేళ కంపెనీ సరైన డాక్యుమెంట్లు సమర్పించకపోయినా లేదా ఏజెన్సీతో సహకరించకపోయినా, దానిని 'నాన్-కోఆపరేషన్'గా పరిగణిస్తారు.
ఫైన్లు మరియు డీమ్యాట్ ఫ్రీజ్
నిబంధనలను ఉల్లంఘించే కంపెనీలకు ₹50,000 జరిమానా విధించాలని SEBI ప్రతిపాదించింది. అంతేకాదు, వరుసగా 15 రోజులు మరియు ఆపై 10 రోజుల పాటు సమాధానం ఇవ్వకపోతే, ఎక్స్ఛేంజీలు నేరుగా ప్రమోటర్ల డీమ్యాట్ ఖాతాలను ఫ్రీజ్ చేసే అధికారాన్ని కలిగి ఉంటాయి. అలాగే, ఈ వివాదం పరిష్కారమయ్యే వరకు కంపెనీ తన మానిటరింగ్ ఏజెన్సీని మార్చడానికి వీలుండదు.
ఇన్వెస్టర్లకు భరోసా
ఈ నిబంధనలను ICDR నుంచి మరింత పటిష్టమైన LODR ఫ్రేమ్‌వర్క్‌లోకి మార్చడం ద్వారా, IPO నిధుల వినియోగం అనేది ఒకసారి జరిగే ప్రక్రియ కాకుండా నిరంతర పర్యవేక్షణలో ఉండేలా SEBI ప్లాన్ చేస్తోంది. దీనివల్ల రీటైల్ ఇన్వెస్టర్ల సొమ్ము దుర్వినియోగం అయ్యే ముప్పు తగ్గుతుందని మార్కెట్ నిపుణులు భావిస్తున్నారు.