2014-2015 మధ్య BSEలో జరిగిన ఇల్లిక్విడ్ ఆప్షన్ ట్రేడింగ్ కేసులను పరిష్కరించుకోవడానికి SEBI నాలుగోసారి సెటిల్మెంట్ విండోను అందుబాటులోకి తెచ్చింది. నిర్ణీత ఫీజు చెల్లించడం ద్వారా పెండింగ్ కేసులను ముగించుకునే అవకాశం కల్పించింది.
మార్కెట్ నియంత్రణ సంస్థ SEBI, గతంలో ఇల్లిక్విడ్ స్టాక్ ఆప్షన్ల విభాగంలో జరిగిన కృత్రిమ ట్రేడింగ్పై తీసుకున్న చర్యలను పరిష్కరించుకోవడానికి మరో అవకాశం ఇచ్చింది. ఏప్రిల్ 1, 2014 నుండి సెప్టెంబర్ 30, 2015 మధ్య బాంబే స్టాక్ ఎక్స్ఛేంజ్ (BSE)లో జరిగిన ట్రేడ్లపై అప్పట్లో నిబంధనల ఉల్లంఘన జరిగిందని అధికారులు గుర్తించారు. దీనివల్ల వేలాది మందిపై కేసులు నమోదై, సెక్యూరిటీస్ అప్పిలేట్ ట్రిబ్యునల్ (SAT)లో కేసులు పేరుకుపోయాయి.
సెటిల్మెంట్ ఫీజు వివరాలు
ఈ కొత్త సెటిల్మెంట్ స్కీమ్ ప్రకారం, మీరు చేసిన కాంట్రాక్టుల సంఖ్యను బట్టి ఫీజు నిర్ణయించారు:
- 1 నుండి 5 కాంట్రాక్టులు: ₹1.44 లక్షలు
- 6 నుండి 50 కాంట్రాక్టులు: ₹2.88 లక్షలు
- 51 అంతకంటే ఎక్కువ కాంట్రాక్టులు: ₹7.2 లక్షలు + ప్రతి అదనపు కాంట్రాక్టుకు ₹14,400. ఉదాహరణకు, 51 కాంట్రాక్టులు ఉన్నవారు ₹14.544 లక్షలు చెల్లించాల్సి ఉంటుంది.
పెండింగ్ కేసులకు ముగింపు
హై పవర్ అడ్వైజరీ కమిటీ సిఫార్సుల మేరకు ఈ విండోను ప్రారంభించారు. 2020, 2022, 2024 తర్వాత వచ్చిన నాలుగో విండో ఇది. కోర్టులపై భారం తగ్గించడం, ఇన్వెస్టర్లు-సంస్థలు త్వరగా ఈ సమస్యల నుండి బయటపడటమే దీని ప్రధాన ఉద్దేశ్యం. దీనికి సంబంధించిన పూర్తి గైడ్ లైన్స్ త్వరలోనే అందుబాటులోకి రానున్నాయి. SEBI Act 1992 ప్రకారం ఈ సెటిల్మెంట్ ప్రక్రియ పూర్తి కానుంది.