2013 నుంచి మూతపడిన Calcutta Stock Exchangeని మళ్లీ ప్రారంభించడంపై SEBI చైర్మన్ తుహిన్ కాంత పాండే సందేహాలు వ్యక్తం చేశారు. నేషనల్ స్టాక్ ఎక్స్ఛేంజీల పోటీని తట్టుకోవడం ఈ ప్రాంతీయ సంస్థకు సవాలుగా మారనుంది.
ఎందుకు ఈ అయోమయం?
ఏప్రిల్ 2013 నుంచి Calcutta Stock Exchange (CSE) తన కార్యకలాపాలను నిలిపివేసింది. నిబంధనలను పాటించకపోవడమే దీనికి ప్రధాన కారణం. ఇప్పుడు పశ్చిమ బెంగాల్ ప్రభుత్వం ఈ పాత ఎక్స్ఛేంజ్‌ను మళ్లీ తెరవాలని బడ్జెట్‌లో ప్రతిపాదించినప్పటికీ, సెబీ (SEBI) మాత్రం చాలా కఠినంగా ఉంది. నిబంధనల విషయంలో ఎటువంటి మినహాయింపులు ఉండవని స్పష్టం చేసింది.
మారుతున్న కాలం.. మారని సవాళ్లు
గత 20 ఏళ్లలో భారత స్టాక్ మార్కెట్ రూపురేఖలు పూర్తిగా మారిపోయాయి. ఒకప్పుడు ప్రాంతీయ ఎక్స్ఛేంజీలకు ఉన్న డిమాండ్ ఇప్పుడు లేదు. నేడు నేషనల్ స్టాక్ ఎక్స్ఛేంజ్ (NSE), బాంబే స్టాక్ ఎక్స్ఛేంజ్ (BSE) అత్యంత వేగవంతమైన, తక్కువ ఖర్చుతో కూడిన ట్రేడింగ్ ప్లాట్‌ఫామ్‌లను అందిస్తున్నాయి. ప్రాంతీయ సంస్థలు వీటితో పోటీ పడటం అసాధ్యమనే వాదన బలంగా వినిపిస్తోంది.
టెక్నాలజీయే పెద్ద అడ్డంకి
నేటి కాలంలో ఎక్స్ఛేంజ్ నడపాలంటే సాధారణ విషయం కాదు. ఆర్టిఫిషియల్ ఇంటెలిజెన్స్, హై-ఫ్రీక్వెన్సీ ట్రేడింగ్ వంటి అత్యాధునిక మౌలిక సదుపాయాల కోసం భారీ పెట్టుబడులు అవసరం. వీటిని భరిస్తూ, తగినంత ట్రేడింగ్ వాల్యూమ్‌ను సాధించడం CSEకి పెద్ద సవాలుగా మారింది. సురక్షితమైన మార్కెట్ కోసం సెబీ విధించిన కఠినమైన నిబంధనలను, క్యాపిటల్ రిక్వైర్మెంట్లను నెరవేర్చడం ఇప్పుడు ఆ సంస్థ ముందున్న ప్రధాన లక్ష్యం. ఒక బలమైన బిజినెస్ ప్లాన్ లేనిదే ఎక్స్ఛేంజ్ పునరుద్ధరణ అసాధ్యమని మార్కెట్ నిపుణులు అభిప్రాయపడుతున్నారు.