ఇండియా-మారిషస్ పన్ను ఒప్పందంలో కీలక మార్పులు వచ్చాయి. ఇకపై కేవలం ట్యాక్స్ రెసిడెన్సీ ఉంటే సరిపోదు, 'ప్రిన్సిపల్ పర్పస్ టెస్ట్' (PPT) పేరుతో ప్రభుత్వం కొత్త నిబంధనను తీసుకువచ్చింది. దీనివల్ల పన్ను ఎగవేతకు అడ్డుకట్ట పడే అవకాశం ఉంది.
భారత ప్రభుత్వం మారిషస్‌తో కుదుర్చుకున్న డబుల్ టాక్సేషన్ అవాయిడెన్స్ అగ్రిమెంట్ (DTAA)లో 'ప్రిన్సిపల్ పర్పస్ టెస్ట్' (PPT)ని అధికారికంగా ప్రవేశపెట్టింది. దీనివల్ల, ఒక ఇన్వెస్ట్‌మెంట్ లేదా లావాదేవీ కేవలం పన్నులను ఆదా చేసుకోవడానికే చేస్తున్నట్లు గుర్తిస్తే, ఆ ప్రయోజనాలను నిలిపివేసే అధికారం పన్ను శాఖకు ఉంటుంది. ప్రపంచవ్యాప్తంగా పన్ను ఎగవేతను అరికట్టడానికి అమలు చేస్తున్న OECD నిబంధనల్లో ఇది ఒక భాగం.
ఇన్వెస్టర్లపై ప్రభావం ఏమిటి?
గతంలో మారిషస్‌లో ఉన్న సంస్థలు కేవలం 'ట్యాక్స్ రెసిడెన్సీ సర్టిఫికేట్' చూపిస్తే పన్ను మినహాయింపులు లభించేవి. కానీ, ఇకపై ఆ పెట్టుబడి వెనుక నిజమైన బిజినెస్ ఉద్దేశం (Commercial Substance) ఉందో లేదో నిరూపించుకోవాల్సిన బాధ్యత పెట్టుబడిదారులపైనే ఉంటుంది. దీనికోసం ఇన్వెస్టర్లు తమ లావాదేవీలకు సంబంధించిన పక్కా డాక్యుమెంటేషన్‌ను సిద్ధం చేసుకోవాలి.
పాత ఒప్పందాలకు వర్తిస్తుందా?
ఈ నిబంధన భవిష్యత్తులో జరిగే కొత్త లావాదేవీలకు మాత్రమే వర్తిస్తుందని సెంట్రల్ బోర్డ్ ఆఫ్ డైరెక్ట్ టాక్సెస్ (CBDT) స్పష్టం చేసింది. అయితే, పన్ను అధికారులు ఈ కొత్త నిబంధనను ఎలా అమలు చేస్తారు, ఎలాంటి గైడ్‌లైన్స్ ఇస్తారు అనే అంశంపైనే ప్రస్తుతం మార్కెట్ వర్గాలు ఎదురుచూస్తున్నాయి. షెల్ కంపెనీల ద్వారా భారత్‌లోకి నిధులు రాకుండా అడ్డుకోవడమే ప్రభుత్వ ప్రధాన లక్ష్యంగా కనిపిస్తోంది.