GST రిటర్న్ ఫైలింగ్‌ను మరింత సులభతరం చేసేందుకు కేంద్ర ఆర్థిక మంత్రిత్వ శాఖ సిద్ధమవుతోంది. ఏప్రిల్ 1, 2027 నాటికి కొత్త ఫారమ్‌లను అందుబాటులోకి తీసుకురానుండగా, నవంబర్ 1, 2026 నుంచి పబ్లిక్ ఫీడ్‌బ్యాక్ ప్రక్రియ ప్రారంభం కానుంది.
కేంద్ర ఆర్థిక మంత్రిత్వ శాఖ GST రిటర్న్ ఫైలింగ్ విధానాన్ని సమూలంగా మార్చేందుకు ప్రణాళికలు సిద్ధం చేసింది. ముఖ్యంగా వ్యాపారాలకు ఎదురవుతున్న కంప్లయన్స్ కష్టాలను తగ్గించడం, పన్ను మ్యాచింగ్‌లో వచ్చే గందరగోళాలను తొలగించడం ఈ సంస్కరణల ప్రధాన ఉద్దేశ్యం. సెంట్రల్ బోర్డ్ ఆఫ్ ఇండైరెక్ట్ టాక్సెస్ అండ్ కస్టమ్స్ (CBIC) నవంబర్ 1, 2026 నుండి నవంబర్ 30, 2026 వరకు MyGov పోర్టల్ ద్వారా డ్రాఫ్ట్ ఫారమ్‌లపై ప్రజల నుంచి సలహాలను స్వీకరించనుంది.
ప్రధాన మార్పులు ఏమిటి?
GSTR-1, GSTR-1A, IFF మరియు GSTR-3B ఫారమ్‌లను ఒకదానికొకటి అనుసంధానం చేయడం ద్వారా రిపోర్టింగ్ లోపాలను తగ్గించాలని ప్రభుత్వం భావిస్తోంది. ఇప్పటివరకు ఉన్న సాంకేతిక లోపాల వల్ల కంపెనీలకు వస్తున్న ఆటోమేటెడ్ నోటీసుల సమస్యలకు దీనితో చెక్ పడనుంది. అలాగే, రివర్స్ ఛార్జ్ మెకానిజం కింద చెల్లించే పన్నుల కోసం కొత్తగా 'రూల్ 86D' ద్వారా ఎలక్ట్రానిక్ స్టేట్‌మెంట్ సదుపాయాన్ని తీసుకువస్తున్నారు.
ఆడిటింగ్ ప్రక్రియలో ఊరట
ప్రస్తుతం వివిధ రాష్ట్రాల్లో వ్యాపారాలు చేస్తున్న కంపెనీలు, ఆయా రాష్ట్రాల వారీగా విడివిడిగా ఆడిటింగ్ ఎదుర్కోవడం పెద్ద భారంగా మారింది. ఈ కొత్త విధానంతో ఆడిట్ ప్రక్రియను మరింత సరళతరం చేయనున్నారు. ఇది వ్యాపారాల కార్యకలాపాల సామర్థ్యాన్ని పెంచడమే కాకుండా, అదనపు ఖర్చులను కూడా తగ్గిస్తుంది. ఏప్రిల్ 2027 గడువు లోపు కంపెనీలు తమ అకౌంటింగ్ సాఫ్ట్‌వేర్‌లను కొత్త ఫార్మాట్‌కు అనుగుణంగా మార్చుకోవాల్సి ఉంటుంది.