ప్రభుత్వ టెండర్లలో మోసపూరిత కార్యకలాపాలకు పాల్పడినందుకు HP India పై కాంపిటీషన్ కమిషన్ ఆఫ్ ఇండియా (CCI) భారీ జరిమానా విధించింది. 2017 నుండి 2020 మధ్య కాలంలో, HP India మరియు దాని 16 అధీకృత రీసెల్లర్లు కలిసి ప్రభుత్వ టెండర్లలో బిడ్డింగ్ మానిప్యులేషన్ (bid-rigging) కు పాల్పడ్డారు. దీనివల్ల సరసమైన పోటీకి ఆటంకం ఏర్పడింది.
టెండర్లలో మోసం ఎలా జరిగింది?
ప్రభుత్వ టెండర్లలో HP India మరియు దాని 16 మంది అధీకృత రీసెల్లర్లు కలిసి ఒక సిండికేట్ గా ఏర్పడి, బిడ్డింగ్ ప్రక్రియను తారుమారు చేశారని CCI గుర్తించింది. ఈ కుంభకోణం 2017 నుండి 2020 వరకు ప్రభుత్వ ఈ-మార్కెట్ ప్లేస్ (GeM) పోర్టల్ ద్వారా జరిగిన కొనుగోళ్లపై జరిగింది.
మాన్యుఫ్యాక్చరర్ ఆథరైజేషన్ ఫారమ్స్ (MAFs) తో మాయాజాలం
ప్రభుత్వ టెండర్లలో పాల్గొనడానికి మాన్యుఫ్యాక్చరర్ ఆథరైజేషన్ ఫారమ్స్ (MAFs) తప్పనిసరి. HP India ఈ ఫారమ్స్ ను ఎంపిక చేసిన రీసెల్లర్లకే ఇచ్చి, ఇతర పోటీదారులను టెండర్ ప్రక్రియ నుండి దూరం పెట్టింది. కొత్తగా వచ్చిన GeM పోర్టల్ లో కూడా ఇదే పద్ధతిని అనుసరించారు. దీనివల్ల రీసెల్లర్లు తమ లాభాలను పెంచుకోవడానికి, మార్కెట్ లో తమ స్థానాన్ని కాపాడుకోవడానికి కంపెనీతో కలిసి పనిచేసారు.
కవర్ బిడ్డింగ్ తో కప్పేసారు
టెండర్ నిబంధనలను పాటించినట్లు కనిపించడానికి, HP India కుమ్మక్కు అయిన రీసెల్లర్లు 'కవర్ బిడ్డింగ్' పద్ధతిని ఉపయోగించారు. అంటే, కొందరు రీసెల్లర్లు కావాలనే అధిక ధరలతో లేదా పోటీ పడలేని బిడ్స్ వేసేవారు. దీనివల్ల అవసరమైన కనీస బిడ్డర్ల సంఖ్య ఉన్నట్లు కనిపించినా, ముందే నిర్ణయించుకున్న రీసెల్లర్ టెండర్ ను గెలుచుకునేవారు.
HP India వాదన.. CCI తిరస్కరణ
తాము ఈ కుట్రలో ప్రధాన పాత్ర పోషించలేదని, రీసెల్లర్ల ఒత్తిడి వల్లే ఇలా చేయాల్సి వచ్చిందని HP India వాదించింది. అయితే, CCI ఈ వాదనలను తోసిపుచ్చింది. కంపెనీ ఈ కుమ్మక్కులో కీలక పాత్ర పోషించిందని స్పష్టం చేసింది.
రెగ్యులేటరీ చర్య.. ఇన్వెస్టర్లకు హెచ్చరిక
HP India స్వయంగా లీనియెన్సీ అప్లికేషన్ (leniency application) పెట్టుకోవడంతో ఈ కేసు ముందుకు సాగింది. దీనివల్ల జరిమానా తగ్గినప్పటికీ, ₹126.87 కోట్ల ఫైన్ విధించడం ప్రభుత్వ కొనుగోళ్ల ప్రక్రియను దెబ్బతీయడం ఎంత తీవ్రమైన విషయమో తెలియజేస్తుంది. ఇన్వెస్టర్లు ఈ పరిణామాన్ని రెగ్యులేటరీ రిస్క్ గా పరిగణించాలి. కంపెనీ తన డిస్ట్రిబ్యూషన్ నెట్వర్క్ ను, పబ్లిక్ సెక్టార్ తో లావాదేవీలను ఎలా నిర్వహిస్తుందో గమనించాలి.