PM Surya Ghar Muft Bijli Yojana పథకం తదుపరి దశలో దేశీయంగా తయారైన ఇన్వర్టర్లు, బ్యాటరీలను తప్పనిసరి చేయాలని కేంద్రం యోచిస్తోంది. దిగుమతులపై ఆధారపడటాన్ని తగ్గించి, స్థానిక మాన్యుఫాక్చరింగ్ రంగాన్ని బలోపేతం చేయడమే ఈ నిర్ణయం వెనుక ఉన్న ప్రధాన ఉద్దేశ్యం.
స్వదేశీ తయారీకి పెద్దపీట
Ministry of New and Renewable Energy (MNRE) ఇప్పుడు కీలక నిర్ణయం దిశగా అడుగులు వేస్తోంది. రాబోయే రోజుల్లో సోలార్ రూఫ్-టాప్ ప్రాజెక్టుల్లో ఉపయోగించే ఇన్వర్టర్లు, బ్యాటరీ స్టోరేజ్ సిస్టమ్స్ ఖచ్చితంగా భారతదేశంలోనే తయారవ్వాలనే నిబంధనను తీసుకురావాలని ప్రభుత్వం పరిశీలిస్తోంది. ఇప్పటికే సోలార్ మాడ్యూల్స్ విషయంలో అనుసరిస్తున్న వ్యూహాన్నే, ఇప్పుడు ఈ పరికరాల విషయంలో కూడా అమలు చేయాలని చూస్తోంది.
భారీ టార్గెట్స్.. అదిరిపోయే అవకాశాలు
ప్రస్తుతం దేశంలో 50 లక్షల పైగా ఇళ్లలో రూఫ్-టాప్ సోలార్ ప్లాంట్లు ఏర్పాటు అయ్యాయి. ₹75,021 కోట్ల భారీ బడ్జెట్‌తో నడుస్తున్న ఈ పథకం మార్చి 31, 2027 వరకు కొనసాగుతుంది. Indian Solar Manufacturers Association (ISMA) అంచనాల ప్రకారం, 2030 నాటికి దేశంలో సోలార్ రూఫ్-టాప్ సామర్థ్యం 132 GW కి చేరుకునే అవకాశం ఉంది.
సవాళ్లు ఏమున్నాయి?
ఈ నిర్ణయం ఆత్మనిర్భరతకు మంచిదే అయినా, క్షేత్రస్థాయిలో కొన్ని చిక్కులు ఉన్నాయి. బ్యాటరీ తయారీకి అవసరమైన లిథియం, క్యాథోడ్స్, మరియు ఆనోడ్స్ వంటి కీలక ముడి పదార్ధాల కోసం మనం ఇప్పటికీ దిగుమతులపైనే ఆధారపడుతున్నాం. ఒకవేళ తయారీని తప్పనిసరి చేసి, సరైన ముడి పదార్ధాల సరఫరా లేకపోతే, సోలార్ ప్రాజెక్టుల కాస్ట్ పెరిగే అవకాశం ఉంది. అలాగే, ఈ నిబంధనలు ఇన్స్టాలేషన్ వేగాన్ని తగ్గిస్తాయా? లేక ప్లాంట్ ధరలు సామాన్యులకు అందుబాటులో ఉంటాయా? అనేది ఇప్పుడు ఇన్వెస్టర్లు గమనించాల్సిన ప్రధాన అంశం.