ఉత్తరప్రదేశ్ లో ఇంటి కొనుగోళ్లపై చెల్లించిన GSTని, బిల్డర్లు రీఫండ్ చేయకపోతే.. ఇక నేరుగా టాక్స్ డిపార్ట్మెంట్ నుంచే రీఫండ్ పొందవచ్చు. ఈ ప్రక్రియలో ₹1,000 కంటే తక్కువ రీఫండ్ లు పరిగణనలోకి తీసుకోరు. అలాగే, క్లెయిమ్ చేయడానికి రెండేళ్ల గడువు ఉంది.
ఇంటి కొనుగోలుదారులకు పెద్ద ఊరట
ఇకపై ఉత్తరప్రదేశ్ లో ఇళ్ల కొనుగోలుదారులకు (Homebuyers) ఊరట లభించనుంది. రద్దు అయిన ప్రాజెక్టులు లేదా క్యాన్సిల్ అయిన బుకింగ్స్ పై ఇంటి కొనుగోలుదారులు చెల్లించిన గూడ్స్ అండ్ సర్వీసెస్ టాక్స్ (GST) ని తిరిగి పొందేందుకు అవకాశం కల్పించింది అక్కడి ప్రభుత్వం. సాధారణంగా, ప్రాజెక్ట్ క్యాన్సిల్ అయినప్పుడు డెవలపర్లు అసలు మొత్తాన్ని (Principal Amount) మాత్రమే తిరిగి ఇచ్చేవారు, కానీ GSTని మాత్రం ఉంచుకునేవారు. దీనితో కొనుగోలుదారులు నష్టపోయేవారు.
నేరుగా GST డిపార్ట్మెంట్ నుంచే రీఫండ్
ఇకపై అలాంటి ఇబ్బందులు ఉండవు. ఒకవేళ బిల్డర్ GSTని రీఫండ్ చేయడంలో విఫలమైతే, నేరుగా GST డిపార్ట్మెంట్ ను ఆశ్రయించి రీఫండ్ పొందవచ్చని యూపీ రియల్ ఎస్టేట్ రెగ్యులేటరీ అథారిటీ (RERA) స్పష్టం చేసింది. ప్రాజెక్టులు ఆలస్యం అవ్వడం లేదా మధ్యలో ఆగిపోవడం వంటి సమస్యలు ఎదుర్కొంటున్న కొనుగోలుదారులకు ఈ నిర్ణయం ఎంతో కీలకం.
రీఫండ్ కు కావాల్సిన అర్హతలు
రీఫండ్ కోసం అప్లై చేసుకోవాలంటే, GST రిజిస్ట్రేషన్ నంబర్ లేనివారు ముందుగా వారి పాన్ (PAN) నంబర్ తో GST పోర్టల్ లో రిజిస్టర్ చేసుకోవాలి. తర్వాత, 'అన్-రిజిస్టర్డ్ పర్సన్స్' కేటగిరీ కింద ఫారం GST RFD-01 ని ఫైల్ చేయాల్సి ఉంటుంది. ఈ ప్రక్రియ విజయవంతం కావాలంటే, ఒరిజినల్ ఫ్లాట్/ప్లాట్ బుకింగ్ అగ్రిమెంట్, చెల్లించిన GSTకి సంబంధించిన ఆధారాలు, క్యాన్సిలేషన్ జరిగినట్లు బిల్డర్ ఇచ్చే సర్టిఫికేట్ వంటివి తప్పనిసరిగా సమర్పించాలి.
ముఖ్యమైన గడువులు, పరిమితులు
రీఫండ్ అప్లికేషన్లను ఫైల్ చేయడానికి ప్రభుత్వం రెండేళ్ల గడువును నిర్దేశించింది. ఈ గడువు బుకింగ్ క్యాన్సిలేషన్ జరిగిన తేదీ నుంచి ప్రారంభమవుతుంది. అంతేకాకుండా, రీఫండ్ మొత్తం ₹1,000 కంటే తక్కువ ఉంటే, ఆ క్లెయిమ్ లను టాక్స్ డిపార్ట్మెంట్ పరిగణనలోకి తీసుకోదు. ఈ నిబంధనలన్నీ, రద్దు అయిన రియల్ ఎస్టేట్ ప్రాజెక్టులలో చిక్కుకున్న వ్యక్తుల ఆర్థిక భారాన్ని తగ్గించే దిశగా ఉద్దేశించబడ్డాయి.