పండుగ సీజన్లో రియల్ ఎస్టేట్ డెవలపర్లు ఇచ్చే ఆకర్షణీయమైన ఆఫర్ల వెనుక దాగి ఉన్న మోసాలను పసిగట్టడం ఎలా? ఇల్లు బుక్ చేసే ముందు మీరు తప్పక గమనించాల్సిన 6 కీలక విషయాలు ఇవే.
పండుగ సీజన్ వచ్చిందంటే చాలు, రియల్ ఎస్టేట్ సంస్థలు భారీ డిస్కౌంట్లు, ఉచిత ఇంటీరియర్స్ అంటూ ప్రకటనల వర్షం కురిపిస్తాయి. ఈ ఆఫర్లను చూసి ఎగ్జైట్ అవ్వడం సహజమే కానీ, లోతుల్లోకి వెళ్తే అసలు విషయాలు బయటపడతాయి. సరైన విశ్లేషణ లేకుండా నిర్ణయం తీసుకుంటే భవిష్యత్తులో భారీ ఆర్థిక ఇబ్బందులు ఎదుర్కోవాల్సి వస్తుంది.
కృత్రిమ ధరలు - దాగి ఉన్న ఖర్చులు
చాలామంది బిల్డర్లు ముందుగా బేస్ ప్రైస్‌ను భారీగా పెంచి, ఆ తర్వాత డిస్కౌంట్ ఇస్తున్నట్లు చూపిస్తారు. ఇది ఒక మాయాజాలం మాత్రమే. మీ ఏరియాలో ఉన్న ఇతర ప్రాజెక్టులతో ధరను పోల్చి చూడటం ఉత్తమం. అలాగే, పార్కింగ్, మోడ్యులర్ కిచెన్ వంటి వాటిని 'ఉచితం' అని చెప్పి, ఆ ఖర్చును ప్రాపర్టీ ధరలోనే కలిపేస్తుంటారు. బిల్డర్ దగ్గర తప్పనిసరిగా ఐటమైజ్డ్ కాస్ట్ షీట్ (Itemized cost sheet) అడగండి. వివరాలు ఇవ్వడానికి వెనకాడుతున్నారంటే, అక్కడ ఏదో తేడా ఉన్నట్లు లెక్క.
లీగల్ వెరిఫికేషన్ తప్పనిసరి
ఎంత పెద్ద ఆఫర్ ఇచ్చినా లీగల్ డాక్యుమెంట్స్ విషయంలో రాజీ పడొద్దు. మొదట ప్రాజెక్టుకు RERA రిజిస్ట్రేషన్ ఉందో లేదో అధికారిక వెబ్ సైట్లలో చెక్ చేయండి. ఒకవేళ ఇల్లు 'రెడీ టు మూవ్' అయితే, Occupancy Certificate (OC) తప్పనిసరిగా తీసుకోవాలి. ఇది ఉంటేనే ఆ భవనం నివాసానికి సురక్షితమని అర్థం. ల్యాండ్ టైటిల్ డాక్యుమెంట్లను కూడా ఒకటికి రెండుసార్లు పరిశీలించుకోవడం వల్ల భవిష్యత్తులో వచ్చే కోర్టు కేసుల నుంచి తప్పించుకోవచ్చు.
పేమెంట్ స్కీమ్స్ పట్ల జాగ్రత్త
'బై నౌ, పే లేటర్' వంటి ఆకర్షణీయమైన స్కీమ్స్ చూసి ఆశపడకండి. ఇవి ఎంట్రీ లెవల్‌లో సులభంగా అనిపించినా, మొత్తం ఖర్చును పెంచే ప్రమాదం ఉంది. స్టాంప్ డ్యూటీ, రిజిస్ట్రేషన్ ఛార్జీలు, మెయింటెనెన్స్ డిపాజిట్లు తరచుగా ప్యాకేజీలో ఉండవు. కాబట్టి, కేవలం బుకింగ్ అమౌంట్ చూసి కాకుండా, మొత్తం ప్రాపర్టీ ఓనర్‌షిప్ ఖర్చు ఎంత అవుతుందో లెక్క కట్టుకోవడం తెలివైన పని.