Income Tax డిపార్ట్‌మెంట్ ఇకపై ఇష్టానుసారంగా రీఅసెస్‌మెంట్ చేయడానికి వీల్లేదు. సెక్షన్ 143(2) కింద తప్పనిసరిగా నోటీసు జారీ చేయాలని సుప్రీంకోర్టు స్పష్టం చేసింది. ఒకవేళ నోటీసు ఇవ్వకుండా ప్రొసీడింగ్స్ మొదలుపెడితే, ఆ ప్రక్రియ చెల్లదని కోర్టు తేల్చి చెప్పింది.
ఆదాయపు పన్ను శాఖ (Income Tax Department) ఇకపై నిబంధనలను పాటించాల్సిందేనని సుప్రీంకోర్టు స్పష్టం చేసింది. జస్టిస్ సంజయ్ కుమార్ మరియు సంజీవ్ సచ్‌దేవా నేతృత్వంలోని ధర్మాసనం, సెక్షన్ 143(2) కింద నోటీసు జారీ చేయడం అనేది చాలా కీలకమని, ఇది లేనిదే రీఅసెస్‌మెంట్ ప్రక్రియను ప్రారంభించే అధికారం అధికారులకు లేదని పేర్కొంది.
చట్టపరమైన బాధ్యత
చాలా కాలంగా ఆదాయపు పన్ను శాఖ సెక్షన్ 142(1) కింద సమాచారం పంపి, ఆ తర్వాత రీఅసెస్‌మెంట్ చేసేది. అయితే, కేవలం ఆ నోటీసులతో సరిపెట్టుకోకుండా, సెక్షన్ 143(2) నిబంధనను కూడా ఖచ్చితంగా పాటించాల్సిందేనని కోర్టు చెప్పింది. ఇది కేవలం ఒక చిన్న ప్రక్రియ కాదు, పన్ను అధికారులకు ఉన్న అధికార పరిధికి (Jurisdictional Requirement) సంబంధించిన అంశమని ధర్మాసనం వివరించింది.
సెక్షన్ 292BB పై క్లారిటీ
ఇప్పటి వరకు ఆదాయపు పన్ను శాఖ అధికారులు సెక్షన్ 292BB ను ఆసరాగా చేసుకునేవారు. పన్ను చెల్లింపుదారులు విచారణలో పాల్గొంటే, నోటీసు అందలేదనే వాదనను వారు తోసిపుచ్చేవారు. కానీ, ఇప్పుడు సుప్రీంకోర్టు ఈ వాదనను తిరస్కరించింది. సెక్షన్ 292BB అనేది నోటీసు జారీ చేసిన తర్వాత, డెలివరీలో ఏవైనా చిన్నపాటి లోపాలు ఉంటేనే వర్తిస్తుందని, అసలు నోటీసు ఇవ్వకుండానే ప్రాసెస్ మొదలుపెడితే ఈ సెక్షన్ రక్షణ కల్పించదని స్పష్టం చేసింది.
పన్ను చెల్లింపుదారులకు ఉపశమనం
ఈ తీర్పు పన్ను వివాదాల్లో చిక్కుకున్న వారికి పెద్ద ఊరట. ఇకపై పన్ను చెల్లింపుదారులు తమ కేసుల ఫైల్స్ పరిశీలించుకుని, సెక్షన్ 143(2) నోటీసు జారీ అయ్యిందో లేదో సరిచూసుకోవచ్చు. ఒకవేళ నోటీసు లేకుండా అసెస్‌మెంట్ జరిగితే, దాన్ని కోర్టులో సవాలు చేసి, ఆ ఆర్డర్లను కొట్టివేసేలా చేయవచ్చు.