ఒకేసారి ఎక్కువ రుణాలు: క్రెడిట్ స్కోర్​పై ఈ ప్రభావం చూసుకోండి!

పెరుగుతున్న EMIలతో ఆర్థిక స్వేచ్ఛకు ఆటంకం

ఒకే వ్యక్తికి మార్ట్గేజ్ (Mortgage), ఆటో ఫైనాన్స్ (Auto Financing), పర్సనల్ లోన్ (Personal Loan), ఎడ్యుకేషన్ లోన్ (Educational Debt) వంటి అనేక రకాల లోన్లు ఉండటం వల్ల నెలవారీ చెల్లించాల్సిన మొత్తం పెరుగుతుంది. ఆదాయం గనుక ఈ పెరుగుతున్న EMIలకు అనుగుణంగా లేకపోతే, అద్దె, ఇన్సూరెన్స్ ప్రీమియంలు, పొదుపు వంటి ముఖ్యమైన ఖర్చులకు డబ్బు సరిపోని పరిస్థితి ఏర్పడుతుంది. ఇది ఆర్థికంగా తీవ్ర ఒత్తిడిని పెంచుతుంది.

అధిక DTI తో కొత్త లోన్​లకు అడ్డంకులు

బ్యాంకులు, ఆర్థిక సంస్థలు రుణగ్రహీత యొక్క ఆర్థిక సామర్థ్యాన్ని అంచనా వేయడానికి డెట్-టు-ఇన్​కమ్​ (DTI) రేషియోను పరిశీలిస్తాయి. ఇది ఒక వ్యక్తి మొత్తం నెలసరి ఆదాయంలో ఎంత శాతం లోన్ EMIల కోసం వెచ్చిస్తున్నారో తెలియజేస్తుంది. అనేక లోన్లు తీసుకోవడం వల్ల ఈ DTI రేషియో ఎక్కువగా ఉంటే, భవిష్యత్తులో కొత్త లోన్లు పొందడం కష్టమవుతుంది. గతంలో మంచి క్రెడిట్​ హిస్టరీ ఉన్నా కూడా, రుణాన్ని తిరిగి చెల్లించే సామర్థ్యంపై అనుమానాలతో లోన్​ అప్రూవల్​ ఆలస్యం కావచ్చు.

పలు రకాల లోన్ల వల్ల క్రెడిట్​ స్కోర్​పై ప్రభావం

కేవలం ఎక్కువ లోన్లు ఉండటం వల్ల క్రెడిట్​ స్కోర్​ తగ్గదు. అయితే, అన్ని EMIలను సకాలంలో చెల్లించడం చాలా ముఖ్యం. అన్ని లోన్లను టైమ్​కు కట్టడం వల్ల మీ క్రెడిట్​వర్తినెస్​ (Creditworthiness) పెరుగుతుంది. కానీ, ఒక్క EMI తప్పినా కూడా మీ క్రెడిట్​ స్కోర్​పై వెంటనే ప్రతికూల ప్రభావం పడుతుంది. అంతేకాకుండా, కొద్ది కాలంలోనే అనేక లోన్ల కోసం అప్లై చేయడం వల్ల క్రెడిట్​ రిపోర్ట్​లో ఎక్కువ హార్డ్​ ఇంక్వైరీలు (Hard Inquiries) నమోదై, తాత్కాలికంగా స్కోర్​ తగ్గే అవకాశం ఉంది.

అత్యవసర నిధి (Emergency Fund) ప్రాముఖ్యత

అనేక లోన్లను నిర్వహిస్తున్నవారు ఆర్థికంగా మరింత జాగ్రత్తగా ఉండాలి. ఊహించని ఖర్చులు లేదా ఆదాయంలో కోత వంటి పరిస్థితులు ఎదురైనప్పుడు, తగినంత అత్యవసర నిధి లేకపోతే పరిస్థితి చేయి దాటిపోతుంది. ఎమర్జెన్సీ ఫండ్​ లేకపోతే, లోన్​ EMIలు కట్టలేని స్థితికి చేరుకుంటారు. అందువల్ల, పెద్ద మొత్తంలో అప్పులు చేసే ముందు ఆర్థిక భద్రత కోసం ఎమర్జెన్సీ ఫండ్​ను ఏర్పాటు చేసుకోవడం చాలా అవసరం. ఆర్థిక నిపుణుల ప్రకారం, మంచి ఎమర్జెన్సీ ఫండ్​ ఉన్నవారు ఆర్థిక మాంద్యాలను, వ్యక్తిగత ఆర్థిక సంక్షోభాలను తట్టుకొని నిలబడగలరు. ఆర్థిక ప్రణాళిక సాధనాలు, అవగాహన ద్వారా ఈ రిస్క్​లను తగ్గించుకోవచ్చని మార్కెట్​ పోటీదారులు సూచిస్తున్నారు.