పెళ్లిళ్లలో లేదా బహుమతులుగా వచ్చిన నగలను ఇల్లు కొనడానికి అమ్మితే, దానికి క్యాపిటల్ గెయిన్స్ టాక్స్ కట్టాల్సి ఉంటుంది. బహుమతిగా పొందినప్పుడు పన్ను ఉండదు కానీ, అమ్మేటప్పుడు పాత కొనుగోలు ధర, హోల్డింగ్ పీరియడ్ వంటి అంశాలు కీలకమవుతాయి. పన్ను భారం తగ్గించుకోవడానికి ఉన్న అవకాశాలు ఇవే.
చాలామంది గిఫ్ట్‌గా వచ్చిన నగలను అమ్ముకుంటే ఎటువంటి పన్ను ఉండదని భావిస్తుంటారు, కానీ ఇది పెద్ద పొరపాటు. బంధువుల నుంచి బహుమతిగా వచ్చిన నగలకు ఆదాయపు పన్ను నుంచి మినహాయింపు ఉంటుంది, కానీ అదే నగలను అమ్మి ఇల్లు కొనాలని చూసినప్పుడు, ఆ లాభంపై పన్ను చెల్లించాల్సి వస్తుంది.
కొనుగోలు ధర (Cost of Acquisition) లెక్కే కీలకం
నగలు గిఫ్ట్‌గా వచ్చిన రోజున ఉన్న మార్కెట్ విలువను కొనుగోలు ధరగా పరిగణించకూడదు. పాత యజమాని (Doner) ఆ నగలను కొన్నప్పుడు ఎంత ధరకు కొన్నారో, అదే ధరను మీరు లెక్కలోకి తీసుకోవాలి. ఒకవేళ మీ దగ్గర ఒరిజినల్ ఇన్వాయిస్ లేకపోతే, పన్ను అధికారులు ఆ ధరను సున్నా (Zero) గా పరిగణించే అవకాశం ఉంది, అప్పుడు మొత్తం అమ్మకం ధరపై మీరు పన్ను కట్టాల్సి వస్తుంది.
హోల్డింగ్ పీరియడ్ లెక్కలు
మీరు నగలను అమ్మేటప్పుడు, కేవలం మీ దగ్గర ఉన్న సమయాన్నే కాకుండా, ఆ నగలను మీకు గిఫ్ట్‌గా ఇచ్చిన వ్యక్తి దగ్గర అవి ఎంతకాలం ఉన్నాయో కూడా పరిగణనలోకి తీసుకోవాలి. ఈ మొత్తం కాలం 24 నెలల కంటే తక్కువ ఉంటే, లాభంపై మీ వ్యక్తిగత పన్ను స్లాబ్ ప్రకారం ట్యాక్స్ పడుతుంది. ఒకవేళ 24 నెలల కంటే ఎక్కువ ఉంటే, దాన్ని లాంగ్ టర్మ్ క్యాపిటల్ గెయిన్‌గా పరిగణించి 12.5% పన్ను వసూలు చేస్తారు.
సెక్షన్ 54F ద్వారా మినహాయింపులు
ఇన్కమ్ ట్యాక్స్ చట్టంలోని సెక్షన్ 54F ప్రకారం, నగలు అమ్మిన సొమ్ముతో కొత్త ఇల్లు కొంటే క్యాపిటల్ గెయిన్స్ పన్ను నుంచి మినహాయింపు పొందవచ్చు. అయితే, మీరు ఇల్లు అమ్మే సమయానికి మీకు ఒకటి కంటే ఎక్కువ ఇళ్లు ఉంటే ఈ మినహాయింపు లభించదు. అలాగే, మీరు కొన్న కొత్త ఇంటిని నిర్దిష్ట కాలం పాటు అమ్మకూడదనే నిబంధనలు కూడా ఉంటాయి.
జాగ్రత్తలు:
పన్ను సమస్యలు రాకుండా ఉండాలంటే, ఒరిజినల్ కొనుగోలు బిల్లులు మరియు గిఫ్ట్ డీడ్ వంటి పత్రాలను పదిలంగా ఉంచుకోవడం చాలా ముఖ్యం. ఇల్లు కొనడానికి ముందు పన్ను లెక్కలను జాగ్రత్తగా చూసుకుని, తగిన ప్లానింగ్ చేసుకోవడం వల్ల అనవసరమైన ట్యాక్స్ పెనాల్టీల నుంచి తప్పించుకోవచ్చు.