విదేశాల్లో ఉంటున్న NRIs భారతీయ బ్యాంక్ అకౌంట్లను యాక్సెస్ చేయడంలో ఇబ్బందులు ఎదుర్కొంటున్నారు. కాలం చెల్లిన మొబైల్ నంబర్ల వల్ల OTP రాకపోవడం ఒక సమస్య అయితే, FEMA నిబంధనల ప్రకారం రెసిడెంట్ అకౌంట్లను NRE/NRO గా మార్చుకోకపోవడం వల్ల భారీ జరిమానాలు పడే అవకాశం ఉంది.
విదేశాల్లో స్థిరపడిన NRIs తమ భారతీయ ఆర్థిక లావాదేవీలను నిర్వహించుకోవడంలో అనేక సవాళ్లను ఎదుర్కొంటున్నారు. ముఖ్యంగా, భారతీయ మొబైల్ నంబర్లు పనిచేయకపోవడం వల్ల బ్యాంకింగ్, స్టాక్ మార్కెట్, మ్యూచువల్ ఫండ్ ట్రాన్సాక్షన్లకు అవసరమైన OTPలను పొందడం కష్టమవుతోంది. చాలామంది రీఛార్జ్ చేయకపోవడం లేదా రోమింగ్ సమస్యల వల్ల మొబైల్ నంబర్లను కోల్పోతున్నారు. ఇలాంటి సందర్భాల్లో మళ్లీ యాక్సెస్ పొందాలంటే స్వయంగా ఇండియాకు రావాల్సిందే.
FEMA నిబంధనలు - భారీ జరిమానాలు
మొబైల్ కనెక్టివిటీ కంటే పెద్ద ప్రమాదం FEMA (Foreign Exchange Management Act) నిబంధనల ఉల్లంఘన. ఎన్ఆర్ఐగా మారిన తర్వాత కూడా పాత రెసిడెంట్ సేవింగ్స్ అకౌంట్లను అలాగే ఉంచడం చట్టరీత్యా నేరం. వీటిని తప్పనిసరిగా NRE లేదా NRO ఖాతాలుగా మార్చుకోవాలి. నిబంధనలు పాటించని పక్షంలో బ్యాంకులు ఖాతాలను ఫ్రీజ్ చేయడమే కాకుండా, లావాదేవీలపై మూడు రెట్ల జరిమానా లేదా ₹2,00,000 వరకు పెనాల్టీ, అలాగే నిబంధనలు ఉల్లంఘించిన ప్రతిరోజూ అదనపు ఫైన్ చెల్లించాల్సి ఉంటుంది.
గుడ్ న్యూస్: పెరుగుతున్న పెట్టుబడి పరిమితులు
ఎన్ఆర్ఐ ఇన్వెస్టర్లకు ఊరటనిస్తూ, జూన్ 2026లో రిజర్వ్ బ్యాంక్ ఆఫ్ ఇండియా (RBI) కీలక నిర్ణయం తీసుకుంది. భారతీయ కంపెనీల్లో NRIs వ్యక్తిగత పెట్టుబడి పరిమితిని 10% కి, మొత్తం అగ్రిగేట్ పరిమితిని 24% కి పెంచింది. ఇది ఈక్విటీ మార్కెట్లలో పెట్టుబడి పెట్టే వారికి మరింత వెసులుబాటు కల్పిస్తుంది.
డిజిటల్ KYC పై SEBI కసరత్తు
ప్రస్తుతం ఉన్న ఫిజికల్ KYC పద్ధతులను మార్చేందుకు SEBI వేగంగా అడుగులు వేస్తోంది. ఆగస్టు 14, 2026న విడుదల చేసిన కన్సల్టేషన్ పేపర్లో, డిజిటల్ రిమోట్ KYCని తీసుకురావాలని ప్రతిపాదించింది. ఇది అమల్లోకి వస్తే, ఎన్ఆర్ఐలు ఇండియాకు రాకుండానే తమ డాక్యుమెంట్లను అప్డేట్ చేసుకోవచ్చు.
ముందు జాగ్రత్తగా, బ్యాంక్ రికార్డుల్లో మీ ఈమెయిల్, ప్రస్తుత విదేశీ నంబర్లను వెంటనే అప్డేట్ చేసుకోండి. అలాగే, మీ బ్యాంక్ అంతర్జాతీయ నంబర్లను సపోర్ట్ చేస్తుందో లేదో తనిఖీ చేసుకోండి.