NRI Asset Inheritance: ఆస్తుల వారసత్వంపై FEMA నిబంధనలు - మీరు తెలుసుకోవాల్సిన విషయాలు

భారతదేశంలో ఉన్న బ్యాంక్ డిపాజిట్లు, మ్యూచువల్ ఫండ్స్ లేదా రియల్ ఎస్టేట్ ఆస్తులను NRIలు వారసత్వంగా పొందడం చట్టబద్ధంగానే జరుగుతుంది. అయితే, ఈ ఆస్తులను లేదా వాటి ద్వారా వచ్చే నిధులను విదేశాలకు తరలించేటప్పుడు ఫారిన్ ఎక్స్ఛేంజ్ మేనేజ్మెంట్ యాక్ట్ (FEMA) నిబంధనలను ఖచ్చితంగా పాటించాలి. లేని పక్షంలో భారీ జరిమానాలు ఎదుర్కోవాల్సి వస్తుంది.

నామినీ వర్సెస్ లీగల్ ఓనర్

చాలామంది చేసే ప్రధాన పొరపాటు ఏమిటంటే, బ్యాంక్ అకౌంట్లో నామినీగా ఉన్నంత మాత్రాన ఆ ఆస్తిపై పూర్తి హక్కులు వచ్చేస్తాయని భావిస్తారు. చట్టం ప్రకారం నామినీ అంటే కేవలం ఒక 'కస్టోడియన్' మాత్రమే. వీలునామా (Will) లేదా వారసత్వ చట్టాల ప్రకారం అసలైన వారసులకు ఆ ఆస్తిని అప్పగించాల్సిన బాధ్యత నామినీపై ఉంటుంది. ఈ తేడాను గుర్తించకపోతే కుటుంబ తగాదాలు మరియు చట్టపరమైన ఇబ్బందులు వచ్చే అవకాశం ఉంది.

నిధుల తరలింపు (Repatriation) మరియు పరిమితులు

వారసత్వంగా పొందిన ఆస్తులను విదేశాలకు పంపాలంటే, ఆ నిధులను 'నాన్-రెసిడెంట్ ఆర్డినరీ' (NRO) అకౌంట్ ద్వారానే పంపాలి. FEMA నిబంధనల ప్రకారం, ఒక ఆర్థిక సంవత్సరంలో గరిష్టంగా USD 1 మిలియన్ వరకు మాత్రమే విదేశాలకు పంపడానికి అనుమతి ఉంటుంది. ఒకవేళ ఈ పరిమితి దాటితే, రిజర్వ్ బ్యాంక్ ఆఫ్ ఇండియా (RBI) నుండి ప్రత్యేక అనుమతి తీసుకోవాల్సి ఉంటుంది.

పన్ను మరియు డాక్యుమెంటేషన్ జాగ్రత్తలు

నిధులను తరలించే ముందు సంబంధిత ఆస్తిపై ఉన్న పన్నులన్నీ చెల్లించామా లేదా అనేది ముఖ్యం. దీని కోసం Form 15CA మరియు Form 15CBలను సమర్పించాలి. చార్టర్డ్ అకౌంటెంట్ ద్వారా ధృవీకరించబడిన ఈ పత్రాలు ఉంటేనే బ్యాంకులు నిధులను విదేశాలకు పంపడానికి అనుమతిస్తాయి.

నిబంధనలు అతిక్రమిస్తే..?

FEMA నిబంధనలను ఉల్లంఘిస్తే అది సివిల్ నేరం కిందకు వస్తుంది. చేసిన తప్పిదానికి మూడు రెట్ల (3x) వరకు భారీ పెనాల్టీలు విధించే అధికారం అధికారులకు ఉంది. అంతేకాకుండా, చాలామంది తమ రెసిడెంట్ అకౌంట్లను NRI అయ్యాక NRO అకౌంట్లుగా మార్చుకోవడం మర్చిపోతుంటారు, ఇది కూడా FEMA నిబంధనల ఉల్లంఘనగానే పరిగణించబడుతుంది. సరైన డాక్యుమెంటేషన్ మరియు అకౌంట్ అప్‌డేట్స్ ద్వారా మాత్రమే మీరు ఆస్తులను సురక్షితంగా ఉంచుకోగలరు.