కుటుంబంలో ఎవరైనా మరణించినప్పుడు వారి ఆర్థిక ఆస్తులను, ముఖ్యంగా బ్యాంక్ మరియు Demat ఖాతాలను క్లెయిమ్ చేయడం చాలా ముఖ్యం. ఏడు ఏళ్ల వరకు క్లెయిమ్ చేయకపోతే ఆ నిధులు 'Investor Protection Fund'కు తరలిపోయే ప్రమాదం ఉంది.
ఒక వ్యక్తి మరణించిన తర్వాత, వారి ఆర్థిక ఆస్తులైన బ్యాంక్ బ్యాలెన్స్, డిమ్యాట్ హోల్డింగ్స్ నిర్వహణ కుటుంబ సభ్యులకు పెద్ద బాధ్యతగా మారుతుంది. అన్నింటికంటే ముఖ్యమైన నియమం ఏంటంటే, మరణించిన వ్యక్తి పేరు మీద ఉన్న అకౌంట్స్‌లో లావాదేవీలను వెంటనే ఆపివేయాలి. వారి ఏటీఎం కార్డ్‌లు, చెక్కులు లేదా ఆన్‌లైన్ బ్యాంకింగ్ పాస్‌వర్డ్‌లను వాడటం చట్టరీత్యా నేరం. ఇది వారసులకు భారీ చిక్కులను తెచ్చిపెడుతుంది.
డాక్యుమెంటేషన్ ప్రాముఖ్యత
ఆస్తులను క్లెయిమ్ చేసే ప్రక్రియ, సంబంధిత వ్యక్తి 'విల్' (Will) రాశారా లేదా అనే దానిపై ఆధారపడి ఉంటుంది. ఒకవేళ వీలునామా ఉంటే, ఎగ్జిక్యూటర్ మరణ ధృవీకరణ పత్రంతో పాటు, వీలునామాను ధృవీకరించే పత్రాలను బ్యాంకింగ్ సంస్థలకు సమర్పించాలి. ఆ తర్వాత ఆస్తులను లబ్ధిదారులకు పంచే వరకు తాత్కాలికంగా ఎస్టేట్ అకౌంట్‌ను నిర్వహించవచ్చు.
ఒకవేళ విల్ లేకపోతే, వారసులు చట్టపరమైన పత్రాల ద్వారా తమ హక్కును నిరూపించుకోవాల్సి ఉంటుంది. వీలునామా ఉన్నా లేకపోయినా, ఖాతాదారు మరణం తర్వాత వచ్చే వడ్డీ లేదా డివిడెండ్లపై వచ్చే ఆదాయాన్ని వారసులు తమ స్వంత టాక్స్ ఫైలింగ్‌లో చూపించడం తప్పనిసరి.
7 ఏళ్ల గడువు - భారీ ముప్పు
ఈ విషయంలో అతి పెద్ద ప్రమాదం 'సమయం'. అకౌంట్ ఏడు ఏళ్ల పాటు నిష్క్రియంగా (Dormant) ఉండి, ఎవరూ క్లెయిమ్ చేయకపోతే, నిబంధనల ప్రకారం ఆ నిధులు 'Investor Protection Fund'కు బదిలీ అవుతాయి. అప్పుడు ఆ సొమ్మును తిరిగి పొందడం చాలా సంక్లిష్టమైన, సమయం తీసుకునే ప్రక్రియగా మారుతుంది. అందుకే మరణ ధృవీకరణ పత్రం రాగానే, చట్టపరమైన మార్పులను త్వరగా పూర్తి చేసుకోవడం ద్వారా ఆస్తులు మీ నియంత్రణలోనే ఉండేలా చూసుకోవాలి.