రైల్వే ప్రయాణ బీమా కోసం మీరు చెల్లించేది రూపాయి కాదు, కేవలం 45 పైసలు మాత్రమే. ఇది కేవలం ప్రమాదాలకు మాత్రమే పరిమితం, పూర్తిస్థాయి హెల్త్ ఇన్సూరెన్స్ కాదు. క్లెయిమ్ తిరస్కరణకు గురికాకుండా ఉండాలంటే నామినీ వివరాల నమోదు తప్పనిసరి.
ఆన్‌లైన్‌లో రైలు టికెట్లు బుక్ చేసేటప్పుడు చాలామంది ఇన్సూరెన్స్ ఆప్షన్‌ను ఎంచుకుంటారు. దీన్నే చాలామంది 'రూపాయి ఇన్సూరెన్స్' అని పిలుస్తుంటారు, కానీ వాస్తవానికి దీని ప్రీమియం కేవలం 45 పైసలు మాత్రమే. తక్కువ ఖర్చుతో వస్తుంది కాబట్టి చాలామంది దీన్ని లైట్ తీసుకుంటారు, కానీ దీని పరిధి ఏమిటో అందరికీ తెలియదు. ఇది కేవలం రైలు ప్రయాణానికి సంబంధించిన గ్రూప్ యాక్సిడెంట్ పాలసీ మాత్రమే, ఇది జనరల్ హెల్త్ ఇన్సూరెన్స్ కాదు.
కవరేజ్ పరిమితులు ఏంటి?
ఈ పాలసీ కేవలం Railways Act, 1989 ప్రకారం నిర్వచించిన 'అన్వర్డ్ ఇన్సిడెంట్స్' (untoward incidents)కు మాత్రమే వర్తిస్తుంది. అంటే రైలు ప్రమాదాలు, పట్టాలు తప్పడం, ఉగ్రవాద దాడులు, దోపిడీలు, అల్లర్లు వంటి ఘటనల్లో మాత్రమే ఇది పనిచేస్తుంది. ప్రమాదంలో మరణం లేదా శాశ్వత వైకల్యానికి ₹10 లక్షలు, పాక్షిక వైకల్యానికి ₹7.5 లక్షలు, మరియు ఆసుపత్రి ఖర్చుల కోసం ₹2 లక్షల వరకు కవరేజ్ లభిస్తుంది. సాధారణ అనారోగ్యం లేదా ప్రయాణంలో ఎదురయ్యే ఇతర వైద్య సమస్యలకు ఇది వర్తించదు.
క్లెయిమ్ ప్రక్రియలో చిక్కులు
చాలామంది క్లెయిమ్ సెటిల్మెంట్‌ను IRCTC చూసుకుంటుందని పొరబడతారు. వాస్తవానికి IRCTC ఒక ఫెసిలిటేటర్ మాత్రమే. ఒప్పందం అంతా ప్యాసింజర్‌కు మరియు ఇన్సూరెన్స్ కంపెనీకి మధ్య ఉంటుంది. క్లెయిమ్ కోసం రైల్వే అధికారుల రిపోర్టులు, డిశ్చార్జ్ సమ్మరీలు, అసలు బిల్లులు అవసరమవుతాయి. అత్యంత ముఖ్యమైన విషయం ఏంటంటే.. బుకింగ్ తర్వాత ఇన్సూరెన్స్ వెబ్‌సైట్‌లో నామినీని నమోదు చేయడం. ఇది చేయకపోతే క్లెయిమ్ వచ్చేటప్పుడు చట్టపరమైన ఇబ్బందులు ఎదురవుతాయి.
వివక్షపై విమర్శలు
ప్రస్తుతం ఈ సౌకర్యం కేవలం ఈ-టికెట్ (online) బుక్ చేసుకునే వారికే అందుబాటులో ఉండటం వల్ల, కౌంటర్లలో టికెట్లు కొనే ప్రయాణికులకు ఇది అందడం లేదు. ఈ వివక్షపై సుప్రీంకోర్టు కూడా గతంలోనే ఆందోళన వ్యక్తం చేసింది.
చివరగా, దీన్ని ఒక అదనపు భద్రతా పొరగా మాత్రమే చూడాలి కానీ మీ పూర్తిస్థాయి బీమాగా భావించకూడదు. ప్రయాణం చేసే ప్రతిసారీ నామినీ వివరాలను సరిచూసుకోవడం మర్చిపోకండి.