చాలామంది ఇన్వెస్టర్లు నామినీ అంటే ఆస్తుల యజమాని అని భ్రమపడతారు. నామినీ కేవలం ఒక కస్టోడియన్ మాత్రమే. మీ బ్యాంక్, డీమ్యాట్ మరియు ఇన్సూరెన్స్ ఖాతాలకు నామినేషన్ వివరాలను వేర్వేరుగా అప్డేట్ చేయకపోతే, మీ కుటుంబ సభ్యులు భవిష్యత్తులో తీవ్ర ఇబ్బందులు ఎదుర్కోవాల్సి వస్తుంది.
చాలా మంది భారతీయులు బ్యాంక్ లేదా డీమ్యాట్ ఖాతా ఓపెన్ చేసేటప్పుడు 'నామినేషన్' కాలమ్ నింపడమే ఆర్థిక భద్రత అనుకుంటారు. కానీ, ఇది కేవలం ప్రారంభం మాత్రమే. నామినీకి, చట్టపరమైన వారసుడికి (Legal Heir) ఉన్న తేడాను అర్థం చేసుకోవడం చాలా ముఖ్యం.
నామినీ యజమాని కాదు
చాలామంది చేసే అతి పెద్ద పొరపాటు.. నామినీగా ఎవరి పేరు రాస్తే వారికే ఆ ఆస్తి చెందుతుందని భావించడం. చట్టబద్ధంగా నామినీ అంటే ఒక 'ట్రస్టీ' లేదా 'కస్టోడియన్' మాత్రమే. ఖాతాదారుడు చనిపోయిన తర్వాత ఆ ఆస్తులను హ్యాండిల్ చేసి, చట్టపరమైన వారసులకు అందజేయడం వీరి బాధ్యత. ఒకవేళ మీ వద్ద సరైన 'విల్' (Will) లేకపోతే, నామినీ కాకపోయినా చట్టపరమైన వారసులే ఆస్తికి హక్కుదారులు అవుతారు. దీనివల్ల కుటుంబంలో గొడవలు తలెత్తే అవకాశం ఉంది.
'సెట్ అండ్ ఫర్గెట్' పద్ధతి వద్దు
ఒక బ్యాంక్ ఖాతాలో నామినేషన్ ఇస్తే, అది మీ డీమ్యాట్ లేదా మ్యూచువల్ ఫండ్ ఖాతాలకు వర్తించదు. ప్రతి ఆర్థిక సంస్థ వద్ద విడివిడిగా నామినేషన్లను నమోదు చేయాలి. SEBI నిబంధనల ప్రకారం, ఇప్పుడు మీరు డీమ్యాట్ మరియు మ్యూచువల్ ఫండ్ ఖాతాలకు ముగ్గురు నామినీలను నియమించుకోవచ్చు. అలాగే, ఎవరికి ఎంత వాటా (Percentage) దక్కాలో కూడా స్పష్టంగా పేర్కొనాలి.
జీవితంలోని మార్పులు - అప్డేట్స్
వివాహం, పిల్లల జననం లేదా విడాకులు వంటి సందర్భాల్లో మీ నామినేషన్ వివరాలను కచ్చితంగా సమీక్షించుకోవాలి. ముఖ్యంగా మైనర్లను నామినీగా పెట్టినప్పుడు, వారికి ఒక లీగల్ గార్డియన్ను కూడా నియమించాలి. లేదంటే, అత్యవసర సమయంలో ఆ డబ్బును తీసుకోవడం కష్టమవుతుంది.
విల్ (Will) ప్రాముఖ్యత
నామినేషన్ అనేది కేవలం ఆస్తుల బదిలీకి ఒక అడ్మినిస్ట్రేటివ్ ప్రాసెస్ మాత్రమే, ఇది 'విల్'కు ప్రత్యామ్నాయం కాదు. మీ ఆస్తులన్నింటినీ ఒక చోట రాసి, మీ కుటుంబ సభ్యులకు ఆ వివరాలు తెలిసేలా ఉంచుకోవాలి. నామినేషన్ వివరాలను అప్డేట్ చేస్తూనే, బలమైన 'విల్'ని సిద్ధం చేసుకోవడం ద్వారా మీ కుటుంబానికి భవిష్యత్తులో ఎదురయ్యే లీగల్ చిక్కులను తప్పించవచ్చు.