పండుగ సీజన్ సేల్స్‌లో ఆన్‌లైన్ పేమెంట్స్ పెరగడంతో మోసాల ముప్పు కూడా పెరుగుతోంది. కేవలం షాపింగ్ మనీ మాత్రమే కాకుండా, మీ ఇన్వెస్ట్‌మెంట్ యాప్స్‌తో లింక్ అయిన బ్యాంక్ ఖాతాలను సురక్షితంగా ఉంచుకోవడం ఎలాగో ఇక్కడ తెలుసుకోండి.
భారతదేశంలో పండుగ సీజన్ అంటే ఆన్‌లైన్ లావాదేవీల సందడి మామూలుగా ఉండదు. అందరూ ఆఫర్ల కోసం చూస్తుంటే, ఇదే అదనుగా సైబర్ నేరగాళ్లు రెచ్చిపోతుంటారు. ఇన్వెస్టర్లకు ఇక్కడ అసలు ముప్పు ఏమిటంటే.. షాపింగ్ కోసం వాడే డబ్బులు మాత్రమే కాకుండా, ట్రేడింగ్, ఇన్వెస్ట్‌మెంట్, డీమ్యాట్ అకౌంట్లతో లింక్ అయిన ప్రైమరీ బ్యాంక్ ఖాతాలు కూడా ప్రమాదంలో పడే అవకాశం ఉంది.
ఆర్థిక ఖాతాల భద్రత
చాలామంది ఇన్వెస్టర్లు తమ ప్రధాన సేవింగ్స్ అకౌంట్‌ను వివిధ ఇన్వెస్ట్‌మెంట్ యాప్స్‌కు లింక్ చేసి ఉంచుతారు. ఫెస్టివల్ ఆఫర్ల పేరుతో వచ్చే ఫిషింగ్ లింక్స్ క్లిక్ చేయడం వల్ల మీ లాగిన్ క్రెడెన్షియల్స్ దొంగిలించే ప్రమాదం ఉంది. కాబట్టి, సోషల్ మీడియాలో కనిపించే నమ్మలేని డిస్కౌంట్ ఆఫర్లపై క్లిక్ చేయకుండా జాగ్రత్త వహించడం చాలా ముఖ్యం.
UPI లావాదేవీల విషయంలో జాగ్రత్త
డబ్బులు స్వీకరించడానికి (Receive Money) ఎప్పుడూ UPI PIN అవసరం ఉండదు. ఇది కేవలం డబ్బు చెల్లించడానికి (Authorize Payment) మాత్రమే. ఎవరైనా మీకు డబ్బు పంపిస్తున్నామని చెప్పి PIN ఎంటర్ చేయమని అడిగితే అది ఖచ్చితంగా మోసమని గ్రహించండి. అలాగే, షాపింగ్ చేసేటప్పుడు కార్డు నంబర్లకు బదులుగా 'టోకనైజేషన్' (Tokenization) ఫీచర్‌ను వాడటం ఉత్తమం.
వెబ్‌సైట్ల గుర్తింపు
ఒక వెబ్‌సైట్‌కు ప్యాడ్‌లాక్ గుర్తు ఉన్నంత మాత్రాన అది సురక్షితమని అనుకోవద్దు. ఏదైనా చెల్లింపు చేసే ముందు నేరుగా అధికారిక యాప్ లేదా వెబ్‌సైట్ అడ్రస్‌ను టైప్ చేయండి. నకిలీ వెబ్‌సైట్లలో మీ డీటెయిల్స్ ఎంటర్ చేయడం వల్ల భారీ మూల్యం చెల్లించుకోవాల్సి వస్తుంది.
అత్యవసర చర్యలు
బ్యాంకులు లేదా పేమెంట్ గేట్‌వేలు ఎప్పుడూ ఫోన్ చేసి మీ పాస్‌వర్డ్, OTP లేదా PIN అడగవు. ఒకవేళ మీ ఖాతా నుంచి తెలియకుండా లావాదేవీలు జరిగితే, వెంటనే మీ బ్యాంకుకు ఫోన్ చేసి కార్డును లేదా అకౌంట్‌ను ఫ్రీజ్ చేయించండి. వెంటనే 1930 నంబర్‌కు కాల్ చేసి నేషనల్ సైబర్ క్రైమ్ హెల్ప్‌లైన్‌కు ఫిర్యాదు చేయండి. త్వరగా రిపోర్ట్ చేస్తేనే మీ డబ్బును తిరిగి పొందే అవకాశం ఉంటుంది.