EPF మరియు PPF ఖాతాల్లోని రిటైర్మెంట్ సేవింగ్స్‌ను అప్పులు వసూలు చేసే క్రమంలో బ్యాంకులు లేదా లెండర్లు జప్తు చేయలేవు. అయితే, ఈ రక్షణ ఆ డబ్బులు ఆ ఖాతాల్లో ఉన్నంత వరకే వర్తిస్తుంది. విత్‌డ్రా చేసిన మరుక్షణమే అవి సాధారణ నిధులుగా మారి, జప్తుకు గురయ్యే అవకాశం ఉంటుంది.
ఆర్థిక ఇబ్బందుల్లో ఉన్నప్పుడు చాలామందిని వేధించే ప్రశ్న.. 'నా రిటైర్మెంట్ ఫండ్స్ (EPF, PPF) అప్పుల వాళ్లు లాగేసుకుంటారా?' అని. భారత్‌లో చట్టం ప్రకారం, మీ రిటైర్మెంట్ కోసం దాచుకున్న ఈ నిధులకు ఒక ప్రత్యేకమైన రక్షణ కవచం ఉంది. వీటిని సాధారణ సివిల్ అప్పుల వసూళ్లకు వాడటానికి వీలుండదు.
చట్టం ఏం చెబుతోంది?
ఈ నిధుల భద్రత కోసం ప్రత్యేక చట్టాలు ఉన్నాయి. 1952 నాటి Employees’ Provident Funds and Miscellaneous Provisions Act లోని సెక్షన్ 10 ప్రకారం, EPF ఖాతాలో ఉన్న డబ్బును కోర్టు డిక్రీల ద్వారా కూడా జప్తు చేయడం కుదరదు. అలాగే, Government Savings Promotion Act ద్వారా PPF బ్యాలెన్స్‌లకు కూడా ఇలాంటి రక్షణే ఉంది. Code of Civil Procedure లోని సెక్షన్ 60 కూడా వీటిని జప్తు చేయలేని ఆస్తుల జాబితాలో చేర్చింది.
విత్‌డ్రా చేస్తే రిస్క్ మొదలైనట్లే!
గుర్తుంచుకోవాల్సిన అతిముఖ్యమైన విషయం ఏంటంటే, ఈ చట్టపరమైన రక్షణ ఆ డబ్బు ఆయా ఖాతాల్లో ఉన్నంత వరకే ఉంటుంది. మీరు డబ్బును విత్‌డ్రా చేసి, మీ పర్సనల్ బ్యాంక్ ఖాతాలోకి మార్చుకున్న మరుక్షణం.. ఆ డబ్బు రిటైర్మెంట్ నిధిగా ఉండదు. అది సాధారణ ఆస్తిగా మారుతుంది. అప్పుడు కోర్టు ఆర్డర్ ఉంటే, అప్పులు వసూలు చేసే క్రమంలో బ్యాంక్ ఖాతాలో ఉన్న ఆ డబ్బును లెండర్లు క్లెయిమ్ చేయవచ్చు.
అప్పుల నిర్వహణలో జాగ్రత్త
ఈ చట్టాలు మీ రిటైర్మెంట్ నిధిని కాపాడతాయే కానీ, అప్పుల నుండి తప్పించుకునే మార్గాన్ని మాత్రం చూపవు. మీ రిటైర్మెంట్ ఫండ్స్ సురక్షితంగా ఉన్నాయనే ధీమాతో అప్పులను ఎగవేయడం సరైన పద్ధతి కాదు. లెండర్లు మీ ఇతర ఆస్తులైన ప్రాపర్టీ, షేర్లు లేదా మ్యూచువల్ ఫండ్స్ ద్వారా రికవరీ చేసుకునే అవకాశం ఉంటుంది. కాబట్టి, ఆర్థిక సమస్యలు ఎదురైనప్పుడు చట్టపరమైన రక్షణల మీద ఆధారపడటం కంటే, సరైన డెట్ మేనేజ్‌మెంట్ లేదా సెటిల్‌మెంట్ పద్ధతులను ఎంచుకోవడం ఉత్తమం.