కొత్త కారు కొనేటప్పుడు చాలామంది డీలర్ ఇచ్చే ఇన్సూరెన్స్ ప్యాకేజీని గుడ్డిగా తీసుకుంటారు. కానీ, బయట ఆన్లైన్లో కంపేర్ చేసుకుంటే తక్కువ ప్రీమియంతో మెరుగైన కవరేజీని పొందవచ్చు. ముఖ్యంగా IDV విలువను తనిఖీ చేయడం, అవసరం లేని యాడ్-ఆన్లను తొలగించడం ద్వారా మీరు వేలల్లో డబ్బు ఆదా చేయవచ్చు.
కొత్త కారు కొనే సమయంలో డీలర్ షాపుల్లోనే ఇన్సూరెన్స్ తీసుకోవడం చాలా సులభంగా అనిపిస్తుంది. కానీ, ఇక్కడే అసలైన చిక్కు ఉంది. డీలర్లు అందించే ఇన్సూరెన్స్ ప్యాకేజీలు చాలా సందర్భాల్లో బయట మార్కెట్ ధర కంటే ఎక్కువగా ఉంటాయి. వీరు ఇన్సూరెన్స్ కంపెనీలకు ఏజెంట్లుగా వ్యవహరిస్తూ, కస్టమర్ల నుంచి ఎక్కువ ప్రీమియం వసూలు చేస్తుంటారు.
'క్యాష్లెస్' నిజం ఇదే!
చాలా మంది సేల్స్ టీమ్స్, 'మా దగ్గరే ఇన్సూరెన్స్ తీసుకుంటేనే క్యాష్లెస్ సర్వీస్ ఉంటుంది' అని చెబుతుంటారు. ఇది పూర్తి నిజం కాదు. ఇన్సూరెన్స్ కంపెనీలకు దేశవ్యాప్తంగా ఉన్న నెట్వర్క్ వర్క్షాప్లతో ఒప్పందాలు ఉంటాయి. పాలసీని ఆన్లైన్లో కొన్నా లేదా బయట ఏజెంట్ దగ్గర కొన్నా, ఆ వర్క్షాప్ గనుక ఇన్సూరెన్స్ కంపెనీ నెట్వర్క్లో ఉంటే, మీకు ఖచ్చితంగా క్యాష్లెస్ సర్వీస్ లభిస్తుంది.
IDV - తక్కువ ప్రీమియం వెనుక ఉన్న మోసం
ఇన్సూరెన్స్లో IDV (Insured Declared Value) అత్యంత ముఖ్యమైనది. కారు దొంగతనానికి గురైనా లేదా పూర్తిగా ధ్వంసమైనా మీకు వచ్చే గరిష్ట పరిహారమే ఈ IDV. డీలర్లు కస్టమర్లను ఆకట్టుకోవడానికి కొన్నిసార్లు ప్రీమియం రేటును తక్కువగా చూపుతారు. కానీ, దీని కోసం వారు ఆర్టిఫిషియల్గా IDV విలువను తగ్గించేస్తారు. ఇది చిన్నపాటి లాభంగా అనిపించినా, ప్రమాదం జరిగినప్పుడు మీకు వచ్చే క్లెయిమ్ అమౌంట్ భారీగా తగ్గిపోయే ప్రమాదం ఉంది.
యాడ్-ఆన్ల ఎంపికలో జాగ్రత్త
డీలర్లు ఇచ్చే ప్యాకేజీల్లో అవసరానికి మించిన యాడ్-ఆన్లు ఉంటాయి. ఉదాహరణకు, కొత్త కార్లకు 'Zero Depreciation' కవర్ చాలా ముఖ్యం, ఇది రిపేర్ ఖర్చులను తగ్గించడంలో సహాయపడుతుంది. కానీ అందరికీ 'Return to Invoice' లేదా 'Consumables Cover' అవసరం ఉండకపోవచ్చు. మీ ప్రాంతం మరియు కారు వాడకాన్ని బట్టి అవసరమైన వాటిని మాత్రమే ఎంచుకోవాలి.
ఇలా ప్లాన్ చేయండి:
- డీలర్ నుండి 'ఐటమైజ్డ్ కోట్' (Itemized Quote) అడగండి. ఇందులో ఓన్ డ్యామేజ్, థర్డ్ పార్టీ ప్రీమియం మరియు యాడ్-ఆన్ల ధరలను విడివిడిగా అడగండి.
- ఈ వివరాలతో ఆన్లైన్ ఇన్సూరెన్స్ పోర్టల్స్ లో ధరలను పోల్చి చూడండి.
- క్లెయిమ్ సెటిల్మెంట్ రేషియో మరియు ఇన్సూరెన్స్ కంపెనీ విశ్వసనీయతను బట్టి సరైన పాలసీని ఎంచుకోండి.
సరైన పరిశోధన చేయడం ద్వారా మీరు అనవసరపు ఖర్చులను తగ్గించుకోవడమే కాకుండా, కష్టకాలంలో మెరుగైన ఆర్థిక రక్షణను పొందవచ్చు.