రిసేల్ ప్రాపర్టీలను కొనేటప్పుడు బ్యాంకులు ఇచ్చే వాల్యుయేషన్, మీరు ఒప్పందం చేసుకున్న ధర కంటే తక్కువగా ఉండవచ్చు. దీనిని 'వాల్యుయేషన్ గ్యాప్' అంటారు. దీనివల్ల డౌన్ పేమెంట్ భారం పెరగడమే కాకుండా, బిల్డింగ్ వయస్సు మరియు డాక్యుమెంట్ల లోపాల వల్ల లోన్ రిజెక్ట్ అయ్యే ఛాన్స్ కూడా ఉంది.
రిసేల్ అపార్ట్‌మెంట్ కొనుగోలు చేసేటప్పుడు, మీరు సెల్లర్‌తో నిర్ణయించుకున్న ధర మాత్రమే కాకుండా, బ్యాంక్ చేసే టెక్నికల్ వాల్యుయేషన్ కూడా చాలా కీలకం. సాధారణంగా బ్యాంకులు సేల్ అగ్రిమెంట్ ధర లేదా వారి స్వంత అసెస్‌మెంట్.. ఈ రెండింటిలో ఏది తక్కువైతే దాని ప్రాతిపదికనే లోన్ మంజూరు చేస్తాయి.
వాల్యుయేషన్ గ్యాప్ (Valuation Gap) అంటే ఏమిటి?
ఒక ప్రాపర్టీని మీరు ₹70 లక్షలకి కొంటామంటే, బ్యాంక్ వాల్యుయేషన్ ₹60 లక్షలకి మాత్రమే చేయవచ్చు. ఒకవేళ బ్యాంక్ 80% LTV ఇస్తే, అది ఆ ₹60 లక్షల పైనే లెక్కించబడుతుంది. దీనివల్ల మధ్యలో వచ్చే వ్యత్యాసాన్ని (Shortfall) మీ సొంత జేబు నుంచే భరించాల్సి వస్తుంది, ఇది మీ బడ్జెట్‌ను తలకిందులు చేయగలదు.
బిల్డింగ్ ఏజ్ & స్ట్రక్చర్ ప్రభావం
25 నుండి 30 ఏళ్లు పైబడిన బిల్డింగ్‌ల విషయంలో బ్యాంకులు చాలా జాగ్రత్తగా ఉంటాయి. ఇలాంటి వాటికి లోన్ టెన్యూర్ తగ్గించడం లేదా తక్కువ రుణం ఇవ్వడం జరుగుతుంది. దీనివల్ల EMI భారం పెరుగుతుంది. అలాగే, బిల్డింగ్‌కి స్ట్రక్చరల్ ఆడిట్ రిపోర్ట్ లేకపోతే లోన్ శాంక్షన్ కావడం కష్టమవుతుంది.
లీగల్ చెకప్ ఎందుకు ముఖ్యం?
టోకెన్ అమౌంట్ కట్టేముందే సేల్ డీడ్, ఒరిజినల్ డాక్యుమెంట్లు, ఆక్యుపెన్సీ సర్టిఫికెట్ మరియు ఎన్‌కంబరెన్స్ సర్టిఫికెట్‌ను క్షుణ్ణంగా పరిశీలించాలి. చిన్న లీగల్ గ్యాప్ ఉన్నా లోన్ రిజెక్ట్ అయ్యే అవకాశం ఉంది.
అదనపు ఆర్థిక భారం
₹50 లక్షల కంటే ఎక్కువ విలువైన లావాదేవీలపై మీరు 1% TDS కట్ చేసి ప్రభుత్వానికి చెల్లించాలి. అంతేకాకుండా, స్టాంప్ డ్యూటీ, రిజిస్ట్రేషన్ ఫీజులు మరియు బ్యాంక్ ప్రాసెసింగ్ ఫీజుపై పడే GST అదనపు ఖర్చుగా మారుతాయని గుర్తించుకోవాలి. కాబట్టి, ఎటువంటి ఫైనాన్షియల్ కమిట్‌మెంట్ ఇచ్చే ముందు బ్యాంక్ ప్రీ-అప్రూవల్ తీసుకోవడం ఉత్తమం.