QS Asia Rankings 2027లో భారత్ నుంచి మొత్తం 325 విద్యాసంస్థలు చోటు దక్కించుకున్నాయి. ఆసియాలోనే రెండో అత్యధిక యూనివర్సిటీలు ఉన్న దేశంగా భారత్ నిలిచినా, ఉన్న వాటిలో **71%** సంస్థలు ర్యాంకుల్లో వెనుకబడటం ఆందోళన కలిగిస్తోంది.
QS Asia Rankings 2027 రిపోర్ట్ ప్రకారం, భారత్ తన ఉన్నత విద్యా వ్యవస్థను విస్తరించడంలో ముందంజలో ఉంది. తాజాగా మరో 34 విశ్వవిద్యాలయాలు ర్యాంకింగ్స్‌లోకి రావడంతో, మొత్తం సంఖ్య 325కి చేరింది. అయితే, పరిమాణాత్మకంగా పెరుగుదల ఉన్నప్పటికీ, నాణ్యత పరంగా మన టాప్ విద్యాసంస్థలు ఇబ్బందులను ఎదుర్కొంటున్నాయి. రేటింగ్ పొందిన భారతీయ సంస్థల్లో ఏకంగా 71% సంస్థల ర్యాంకులు గతంతో పోలిస్తే దిగజారాయి.
టాప్ కాలేజీల పరిస్థితి ఇదే..
దేశంలోనే అత్యున్నత విద్యాసంస్థలుగా పేరున్న IIT Delhi 66వ స్థానానికి, IISc Bangalore 79వ స్థానానికి, IIT Bombay 83వ స్థానానికి పడిపోయాయి. ఒకప్పుడు టాప్ 100లో ఉన్న University of Delhi ఈసారి 106వ స్థానానికి పరిమితమైంది. ఇవన్నీ పబ్లిక్ లేదా నాన్-ప్రాఫిట్ సంస్థలు కాబట్టి, వీటి ర్యాంకుల పతనం కేవలం అకడమిక్ మరియు పరిశోధనల నాణ్యతకు సంబంధించినది.
పరిశోధనలో గ్యాప్ ఎక్కడ ఉంది?
భారతీయ వర్సిటీలు పరిశోధనా పత్రాల సంఖ్యలో (Papers Per Faculty) మంచి ఫలితాలు సాధిస్తున్నా, అంతర్జాతీయ గుర్తింపు పొందే 'Citations Per Paper' విభాగంలో వెనుకబడి ఉన్నాయి. ఆసియాలో టాప్ 50లో కేవలం 3 భారతీయ సంస్థలు మాత్రమే నిలవగలిగాయి. పరిశోధనలు ఎక్కువగా జరుగుతున్నా, అవి అంతర్జాతీయ స్థాయిలో ప్రభావం చూపలేకపోవడం ర్యాంకులు తగ్గడానికి ప్రధాన కారణం.
ఉపాధి కల్పనలో తగ్గేదే లే..
ర్యాంకులు తగ్గినప్పటికీ, ఎంప్లాయర్ రిప్యుటేషన్ (Employer Reputation)లో మన ఐఐటీలు (IITs) అద్భుతంగా రాణిస్తున్నాయి. IIT Bombay మరియు IIT Delhi టాప్ 10 స్థానాల్లో కొనసాగుతుండటం గమనార్హం. అంటే, విద్యార్థుల నైపుణ్యంపై పరిశ్రమలకు ఇంకా నమ్మకం ఉందని స్పష్టమవుతోంది. అయితే, అంతర్జాతీయ విద్యార్థులను, ఫ్యాకల్టీని ఆకర్షించడంలోనే మన వర్సిటీలు మరింత పుంజుకోవాల్సి ఉంది.