పంజాబ్‌లోని ఖన్నాలో షాకింగ్ ఘటన జరిగింది. రాజకీయ నాయకుడి ఇంట్లో ఒక ఏఎస్‌ఐ (ASI) స్వయంగా డ్రగ్స్ పెడుతున్న వీడియో సీసీటీవీలో రికార్డ్ అవ్వడంతో, అధికారులు ఆయనను వెంటనే సస్పెండ్ చేశారు.
పంజాబ్‌లోని ఖన్నాలో జరిగిన ఒక ఘటన రాష్ట్రవ్యాప్తంగా సంచలనం సృష్టిస్తోంది. శివసేన నాయకుడు మహంత్ కశ్మీర్ గిరి నివాసంలో ఒక ఏఎస్‌ఐ (ASI) సుఖ్‌దేవ్ సింగ్ డ్రగ్స్ ప్లాంట్ చేస్తున్న దృశ్యాలు సీసీటీవీ కెమెరాల్లో స్పష్టంగా రికార్డయ్యాయి. మ్యాట్రెస్ కింద 30 గ్రాముల హెరాయిన్‌ను దాచిపెట్టిన కొద్దిసేపటికే, పోలీసులు అక్కడ రైడ్ చేసి డ్రగ్స్ దొరికాయని డ్రామా ఆడారు.
సీసీటీవీ బయటపెట్టిన అసలు నిజం
పోలీసుల వాదనను ఈ సీసీటీవీ ఫుటేజ్ పూర్తిగా పటాపంచలు చేసింది. దీంతో ఆ రాజకీయ నాయకుడిపై పెట్టిన కేసును అధికారులు తొలగించాల్సి వచ్చింది. ఈ వ్యవహారంపై స్పందించిన ఖన్నా ఎస్ఎస్‌పి (SSP) డాక్టర్ దర్పణ్ అహ్లూవాలియా, సదరు ఏఎస్‌ఐని వెంటనే సస్పెండ్ చేశారు.
SIT దర్యాప్తు షురూ
ఈ ఘటనపై సమగ్ర విచారణ కోసం ప్రత్యేక దర్యాప్తు బృందాన్ని (SIT) ఏర్పాటు చేశారు. ఈ ఏఎస్‌ఐ సొంతంగా ఈ పని చేశాడా లేక ఎవరి ఆదేశాల మేరకు ఇలా చేశాడు? అనే కోణంలో అధికారులు లోతుగా ఆరా తీస్తున్నారు. రాష్ట్రంలో శాంతిభద్రతల పరిస్థితిపై, పోలీసుల విశ్వసనీయతపై ఇప్పుడు తీవ్ర విమర్శలు వ్యక్తమవుతున్నాయి.