ముంబైలోని ప్రసిద్ధ 'Kyani & Co.' హోటల్పై మహారాష్ట్ర FDA కొరడా ఝళిపించింది. భారీగా పరిశుభ్రత లోపాలు ఉండటంతో, తక్షణమే ఆ కేఫ్ను మూసివేస్తూ ఆదేశాలు జారీ చేసింది. పండుగ సీజన్ నేపథ్యంలో రాష్ట్రవ్యాప్తంగా చేపట్టిన తనిఖీల్లో ఈ షాకింగ్ విషయాలు వెలుగులోకి వచ్చాయి.
ఏం జరిగింది?
సెప్టెంబర్ 27న మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (FDA) అధికారులు ఈ వారసత్వ కట్టడమైన 'Kyani & Co.'లో ఆకస్మిక తనిఖీలు చేపట్టారు. ఈ తనిఖీల్లో బయటపడ్డ విషయాలు చూసి అధికారులు కంగుతిన్నారు. ఆహారం తయారు చేసే చోట ఎలుకలు, ఈగలు, చనిపోయిన బొద్దింకలు కనిపించాయి. అంతేకాదు, ఫ్రిజ్లలో రక్తం మరకలు ఉండటం, డ్రైనేజీ మ్యాన్ హోల్స్ తెరిచి ఉండటం వంటి తీవ్రమైన ఉల్లంఘనలు గుర్తించారు. ఫలితంగా, కేఫ్ లైసెన్స్ను అధికారులు సస్పెండ్ చేశారు.
పండుగ సీజన్ దాడులు
ఈ చర్య కేవలం ఒక హోటల్కే పరిమితం కాలేదు. పండుగ సీజన్ లో వినియోగదారుల ఆరోగ్యాన్ని కాపాడటానికి సెప్టెంబర్ 23 నుండి 27 వరకు రాష్ట్రవ్యాప్తంగా FDA మెరుపు దాడులు నిర్వహించింది. ముంబై, పూణే, కొంకణ్ మరియు సంభాజీనగర్ వంటి ప్రాంతాల్లో ఈ తనిఖీలు సాగాయి. ఇప్పటివరకు రాష్ట్రవ్యాప్తంగా 30 సంస్థల లైసెన్స్లను రద్దు చేశారు. అందులో ముంబైలోనే 13 హోటళ్లు ఉండటం గమనార్హం.
భారీగా సీజ్ చేసిన నిల్వలు
ఈ సోదాల్లో అధికారులు సుమారు 50.6 టన్నుల ఆహార పదార్థాలను (పాలు, స్వీట్లు, డ్రై ఫుడ్స్) స్వాధీనం చేసుకున్నారు. వీటి విలువ సుమారు ₹1.19 కోట్ల పైమాటే. అంతేకాకుండా, ఇప్పటివరకు 22 FIRలు నమోదు చేసి, నిబంధనలు పాటించని 30 మందిని పోలీసులు అరెస్టు చేశారు. మళ్లీ హోటల్ తెరవాలంటే, యాజమాన్యం కఠినమైన ఫుడ్ సేఫ్టీ ప్రమాణాలను పాటించి, FDA నుండి మళ్లీ క్లియరెన్స్ తీసుకోవాల్సి ఉంటుంది.