మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (FDA) థానేలో చేసిన దాడుల్లో రూ. 20.48 లక్షల విలువైన ఆహార పదార్థాలను సీజ్ చేసింది. మొత్తం 11 తయారీ కేంద్రాల్లో నిబంధనలకు విరుద్ధంగా కార్యకలాపాలు సాగుతున్నట్లు అధికారులు గుర్తించారు.
మహారాష్ట్ర FDA అధికారులు థానే జిల్లాలోని ఖార్డీ గ్రామం (శిల్-దివా) ప్రాంతంలో ఉన్న 11 ఫుడ్ మాన్యుఫ్యాక్చరింగ్ యూనిట్లపై మెరుపు దాడులు నిర్వహించారు. ఈ సోదాల్లో సుమారు 28,955 కిలోల ఆహార పదార్థాలు, 56 లీటర్ల నూనెను అధికారులు స్వాధీనం చేసుకున్నారు. వీటి మార్కెట్ విలువ దాదాపు ₹20.48 లక్షలు ఉంటుందని అంచనా.
ఎందుకు ఈ దాడులు?
ఈ యూనిట్లలో పరిశుభ్రత అస్సలు లేదు. ఉత్పత్తి కేంద్రాల్లో ఎలుకలు, కీటకాలు ఉండటం, నేలలు అపరిశుభ్రంగా ఉండటాన్ని అధికారులు గమనించారు. ముఖ్యంగా వీటిని నడపడానికి ఎలాంటి ఫుడ్ లైసెన్సులు లేకపోవడం, సరైన లేబులింగ్ లేకపోవడం వంటి తీవ్రమైన లోపాలు బయటపడ్డాయి. ఫుడ్ అండ్ డ్రగ్ అడ్మినిస్ట్రేషన్ కమిషనర్ తుకారాం ముండే నేతృత్వంలో సాగుతున్న 'సేఫ్ ఫుడ్, సేఫ్ మెడిసిన్, సేఫ్ మహారాష్ట్ర' అనే క్యాంపెయిన్లో భాగంగానే ఈ చర్యలు తీసుకున్నారు.
ఇన్వెస్టర్లకు హెచ్చరిక
ఈ పరిణామం ఫుడ్ ప్రాసెసింగ్ అండ్ డిస్ట్రిబ్యూషన్ రంగంపై నియంత్రణలు కఠినతరం కాబోతున్నాయని సూచిస్తోంది. చిన్న స్థాయి యూనిట్లపై దాడులు జరుగుతున్నప్పటికీ, భవిష్యత్తులో ఈ కంప్లయన్స్ నిబంధనలు పెద్ద కంపెనీల సరఫరా గొలుసు (supply chain)పై కూడా ప్రభావం చూపే అవకాశం ఉంది. ఇకపై లైసెన్సింగ్, హైజీన్ పారామీటర్లలో చిన్నపాటి పొరపాట్లు కూడా వ్యాపారాలపై భారీ ప్రభావం చూపే ప్రమాదం ఉంది.
కొత్త నిబంధనలు
కేవలం తయారీ కేంద్రాలే కాకుండా, ఇకపై బహిరంగ సభల్లో భారీగా ఆహారం వడ్డించే వారు కనీసం 7 రోజుల ముందే అధికారులకు సమాచారం ఇవ్వాలని FDA స్పష్టం చేసింది. ఫుడ్ పాయిజనింగ్ వంటి ప్రమాదాలను నివారించేందుకు ఈ నిర్ణయం తీసుకున్నారు.