Lloyd’s Register Foundation తాజా నివేదిక ప్రకారం, మన దేశంలో **84%** మందికి విపత్తుల గురించి ముందుగానే హెచ్చరికలు అందుతున్నాయి. కానీ, వాటిని ఎదుర్కొనేందుకు సిద్ధంగా ఉన్నవారు మాత్రం కేవలం **40%** మాత్రమే. ప్రభుత్వ హెచ్చరికలను ఆచరణలో పెట్టడంలో మన దేశం ఎదుర్కొంటున్న సవాల్ ఇదే.
మన దేశంలో విపత్తు నిర్వహణ (Disaster Management) వ్యవస్థ టెక్నాలజీ పరంగా బాగానే అభివృద్ధి చెందింది. కానీ, ఆ టెక్నాలజీ ద్వారా వచ్చిన సమాచారాన్ని ప్రజలు ఎలా ఉపయోగిస్తున్నారు అనేదే ఇప్పుడు అతిపెద్ద సమస్య. గ్లోబల్ సగటు 80% ఉండగా, భారత్ తన ప్రజల్లో 84% మందికి హెచ్చరికలను చేరవేస్తోంది. అయితే, ఆ ప్రమాదం నుంచి రక్షించుకునే మార్గాలు ఉన్నవారు మాత్రం కేవలం 40% మాత్రమే, ఇది ప్రపంచ సగటు 64% తో పోలిస్తే చాలా తక్కువ.
ప్రణాళికా లోపం - ప్రధాన కారణం
ఎందుకు ఈ పరిస్థితి నెలకొందంటే, కేవలం 21% భారతీయ గృహాలకు మాత్రమే విపత్తులను ఎదుర్కోవడానికి ఒక సరైన 'సేఫ్టీ ప్లాన్' ఉంది. ఒక ప్రణాళిక సిద్ధంగా ఉన్న కుటుంబాలు విపత్తు సమయంలో సురక్షితంగా బయటపడే అవకాశాలు నాలుగు రెట్లు ఎక్కువగా ఉన్నాయని నివేదిక చెబుతోంది. అంతేకాకుండా, 2023 తో పోలిస్తే ప్రజల్లో వ్యక్తిగత సన్నద్ధత (Personal Agency) 26% తగ్గడం ఆందోళనకరమైన విషయం.
ప్రభుత్వాలపై అతి విశ్వాసం
భారతీయుల్లో 63% మంది ప్రభుత్వాలు తీసుకునే చర్యలపై నమ్మకాన్ని ఉంచుతున్నారు. ఇది గ్లోబల్ యావరేజ్ 53% కంటే ఎక్కువ. అయితే, ప్రభుత్వం చూసుకుంటుంది కదా అని ప్రజలు తమ సొంత భద్రతపై అశ్రద్ధ వహిస్తున్నారని నిపుణులు హెచ్చరిస్తున్నారు. 2027 నాటికి 'యూనివర్సల్ ఎర్లీ వార్నింగ్' వ్యవస్థలను తీసుకురావాలన్న ఐక్యరాజ్యసమితి లక్ష్యం నెరవేరాలంటే, కేవలం అలర్ట్స్ పంపడమే కాదు.. ప్రతి ఇంటిని సిద్ధం చేసే దిశగా విద్యా కార్యక్రమాలు నిర్వహించాల్సిన అవసరం ఎంతైనా ఉంది.