ఓటర్ల నమోదు ప్రక్రియను సులభతరం చేస్తూ, Election Commission of India కీలక నిర్ణయం తీసుకుంది. ఎలక్టోరల్ రోల్ రివిజన్ పూర్తయిన రాష్ట్రాల్లో ఫామ్-6 నుంచి అదనపు డిక్లరేషన్ నిబంధనలను తొలగిస్తూ ఉత్తర్వులు జారీ చేసింది.
ఓటర్ల నమోదు కోసం రూపొందించిన ఫామ్-6 విషయంలో తలెత్తిన వివాదాలకు Election Commission ఆఫ్ ఇండియా తెరదించింది. రివిజన్ ప్రక్రియ ముగిసిన రాష్ట్రాల్లో ఇకపై అదనపు వివరాలు ఇవ్వాల్సిన అవసరం లేదని స్పష్టం చేసింది. దీనితో పాటు, 1960 నాటి రిజిస్ట్రేషన్ ఆఫ్ ఎలెక్టర్స్ రూల్స్ ప్రకారం అసలైన ఫామ్-6 ని మళ్లీ అమలులోకి తెచ్చింది.
ఈ నిర్ణయం ఎందుకు తీసుకున్నారు?
ఈ అదనపు నిబంధనలను సవరించడంపై ఎన్నికల కమిషనర్లు సుఖ్బీర్ సింగ్ సంధు మరియు వివేక్ జోషి తమ అభ్యంతరాలను వ్యక్తం చేశారు. ఫామ్-6 అనేది ఒక చట్టబద్ధమైన పత్రమని, సరైన చట్ట సవరణ లేకుండా కేవలం అడ్మినిస్ట్రేటివ్ ఆర్డర్లతో మార్పులు చేయడం సరికాదని వారు అభిప్రాయపడ్డారు. ఈ క్రమంలో కమిషన్ తన పాత విధానానికే కట్టుబడాలని నిర్ణయించుకుంది.
ఓటర్లకు కలిగే లాభం ఏమిటి?
గతంలో అమల్లోకి తెచ్చిన సవరణల వల్ల తల్లిదండ్రులు లేదా తాతామామల వివరాలు, వారి నియోజకవర్గాల సంఖ్య, పోలింగ్ బూత్ వివరాలు వంటి కఠినమైన సమాచారం ఇవ్వాల్సి వచ్చేది. ముఖ్యంగా 2000 తర్వాత పుట్టిన యువ ఓటర్లు మరియు తిరిగి పేరు నమోదు చేసుకునే వారికి ఇదొక పెద్ద అడ్డంకిగా మారింది. ఇప్పుడు ఈ అనవసరపు ఫీల్డ్స్ తొలగిపోవడంతో దరఖాస్తు ప్రక్రియ వేగవంతం కానుంది.
ప్రస్తుతం, ఎలక్టోరల్ రోల్ రివిజన్ ప్రక్రియ పూర్తయిన రాష్ట్రాల్లో మాత్రమే ఈ మార్పులు అందుబాటులోకి వచ్చాయి. అయితే, ఎక్కడైతే ఇంకా రివిజన్ ప్రక్రియ కొనసాగుతుందో, అక్కడ పాత నిబంధనలే అమల్లో ఉంటాయని కమిషన్ స్పష్టం చేసింది.