ఛత్తీస్గఢ్లోని ధమ్తరిలో మతపరమైన ఆంక్షలు మొదలయ్యాయి. కఠినమైన యాంటీ-కన్వర్షన్ చట్టాల వల్ల ఎదురయ్యే చట్టపరమైన ఇబ్బందులను నివారించేందుకు, కేవలం క్రైస్తవ మతస్తులను మాత్రమే ప్రార్థనలకు అనుమతిస్తున్నారు.
ఛత్తీస్గఢ్లోని ధమ్తరిలో పరిస్థితి ఉద్రిక్తంగా మారింది. స్థానిక చర్చి యాజమాన్యాలు తమ ప్రార్థనా సమావేశాల్లోకి కేవలం క్రైస్తవ మతస్తులకు మాత్రమే ప్రవేశం కల్పిస్తున్నాయి. రాష్ట్రంలో అమలులో ఉన్న కఠినమైన యాంటీ-కన్వర్షన్ చట్టాల వల్ల ఏ చిన్న పొరపాటు జరిగినా పెద్ద సమస్యలు వస్తాయన్న భయంతోనే ఈ నిర్ణయం తీసుకున్నట్లు తెలుస్తోంది.
చట్టం ఎంత కఠినంగా ఉందంటే..
ప్రస్తుతం రాష్ట్రంలో అమలవుతున్న చట్టాల ప్రకారం, బలవంతపు లేదా అక్రమ మతమార్పిడులకు పాల్పడితే భారీ జరిమానాలు విధిస్తున్నారు. తప్పు నిరూపితమైతే ₹25 లక్షల వరకు జరిమానా, భారీ మతమార్పిడి కేసులైతే ఏకంగా జీవిత ఖైదు విధించే అవకాశం కూడా ఉంది. ఈ రిస్క్ నుంచి తప్పించుకోవడానికి చర్చి బయట 'కేవలం సభ్యులకు మాత్రమే ప్రవేశం' అని బోర్డులు ఏర్పాటు చేశారు.
సెప్టెంబర్ 15 సమావేశం తర్వాత..
ఈ పరిణామాలు సెప్టెంబర్ 15న జిల్లా కలెక్టరేట్లో జరిగిన సమావేశం తర్వాత వేగవంతమయ్యాయి. ముందస్తు సమాచారం లేకుండానే అక్కడకు పిలిపించి, కొంతమంది రైట్ వింగ్ గ్రూపుల ఒత్తిడితో అన్యమతస్థులను అనుమతించవద్దని డిమాండ్ చేశారు. దీనిపై ధమ్తరి డిస్ట్రిక్ట్ క్రిస్టియన్ ఫోరం స్పందిస్తూ, సుమారు 1,000 మంది వ్యక్తులు తాము స్వచ్ఛందంగానే ప్రార్థనలకు హాజరవుతున్నామని అఫిడవిట్లు ఇచ్చినా, చట్టపరమైన రక్షణ కోసం ఇప్పుడు ఈ కఠిన నిర్ణయం తీసుకోవాల్సి వచ్చిందని పేర్కొంది. ప్రస్తుతం జిల్లా యంత్రాంగం దీనిపై ఎటువంటి నిర్ణయం తీసుకోకపోవడంతో స్థానికంగా అయోమయం నెలకొంది.