ముంబైకి చెందిన ITAT కీలక తీర్పును వెలువరించింది. రీడెవలప్మెంట్ ప్రాజెక్టుల్లో టెనెన్సీ హక్కులను వదులుకుని కొత్త ఫ్లాట్లు పొందే టెనెంట్లకు Section 56(2)(x) కింద పన్ను వర్తించదని స్పష్టం చేసింది.
రీడెవలప్మెంట్ వివాదానికి చెక్
ముంబైలోని హౌసింగ్ సొసైటీల్లో రీడెవలప్మెంట్ ప్రాజెక్టుల కోసం వేచి చూస్తున్న వేలాది మందికి ఆదాయపు పన్ను అప్పిలేట్ ట్రిబ్యునల్ (ITAT) ఊరటనిచ్చింది. టెనెంట్లకు కేటాయించే ప్రత్యామ్నాయ వసతి (Alternate Accommodation) విలువపై ఆదాయపు పన్ను శాఖ విధించాలనుకున్న పన్నును ట్రిబ్యునల్ కొట్టివేసింది.
గొడవ ఎక్కడ మొదలైంది?
పన్ను అధికారులు Section 56(2)(x) నిబంధనను తెరపైకి తెచ్చారు. ఎటువంటి నగదు చెల్లింపు లేకుండా ఆస్తిని పొందితే అది 'ఆదాయం' కిందకు వస్తుందని, అందుకే ₹1.38 కోట్ల స్టాంప్ డ్యూటీ విలువ గల ఆస్తిపై పన్ను చెల్లించాలని అధికారులు వాదించారు. కమీషనర్ ఆఫ్ అప్పీల్స్ కూడా ఈ వాదనను సమర్థించారు.
ట్రిబ్యునల్ కీలక వ్యాఖ్యలు
ITAT ముంబై ఈ వాదనను తిరస్కరిస్తూ, రెండు ముఖ్యమైన అంశాలను పేర్కొంది:
- పొసెషన్ ముఖ్యం: చట్టం ప్రకారం 'స్వీకరించడం' (Receives) అంటే ఆస్తిని వాస్తవంగా స్వాధీనం చేసుకోవడం. కానీ ఇక్కడ నిర్మాణం ఇంకా పూర్తికాలేదని, కాబట్టి పన్ను వేయడం కుదరదని ట్రిబ్యునల్ స్పష్టం చేసింది.
- టెనెన్సీ హక్కులు: టెనెన్సీ హక్కులను వదులుకోవడం అనేది కేవలం ఖాళీ చేయడం కాదు, అది ఒక విలువైన ఆస్తిని కోల్పోవడమే. ఈ హక్కులను వదులుకున్నందుకు ప్రతిఫలంగానే ఫ్లాట్లు పొందుతున్నారు కాబట్టి, దీన్ని 'గిఫ్ట్'గా భావించలేమని ట్రిబ్యునల్ తేల్చిచెప్పింది.
ఈ తీర్పు పన్ను చెల్లింపుదారులకు గొప్ప ఊరటనిచ్చినప్పటికీ, టెనెన్సీ హక్కులను వదులుకున్నప్పుడు వచ్చే మొత్తంపై 'Capital Gains Tax' నిబంధనలు వర్తించవచ్చని, కాబట్టి డాక్యుమెంటేషన్ పక్కాగా ఉండాలని నిపుణులు సూచిస్తున్నారు.